ہرارے ٹیسٹ، پاکستان نے بغیر کسی نقصان کے 103 رنز بنالیے

ہرارے ٹیسٹ کا پہلا دن پاکستانی باؤلرز کے نام رہا، شاہین شاہ آفریدی اور حسن علی کی شاندار باؤلنگ کے آگے میزبان ٹیم کے بلے باز بے بس نظر آئے، زمبابوے کا کوئی بھی کھلاڑی نصف سنچری نہ بناسکا اور پوری ٹیم 176 رنز پر آؤٹ ہوگئی۔

شاہین شاہ آفریدی اور حسن علی نے 4-4 شکار کیے،نعمان علی کے حصے میں ایک وکٹ آئی۔

جواب میں پاکستانی اوپنرز عابد علی اور عمران بٹ نے محتاط آغاز کیا اور  اور دن کے اختتام تک بغیر کسی نقصان کے 103 رنز بنالیے ہیں ۔ عابد علی 56 اور عمران بٹ 43 رنز سے دوسرے دن کا آغاز کریں گے، پاکستان کو پہلی اننگز کا خسارہ ختم کرنے کے لیے 73 رنز درکار ہیں۔

قومی ٹیم میں ایک تبدیلی کرتے ہوئے یاسر شاہ کی جگہ ساجد خان کو شامل کیا گیا ہے۔ قومی ٹیم میں بابر اعظم، عابد علی، عمران بٹ، اظہر علی، فواد عالم، محمد رضوان، فہیم اشرف، حسن علی، شاہین شاہ آفریدی اور نعمان علی شامل ہیں۔

واضح رہے کہ 3 ٹی ٹوئنٹی میچز کی سیریز میں قومی ٹیم نے زمبابوے کو 1-2 سے شکست دی تھی۔