برطانوی کرکٹر معین علی ٹیسٹ کرکٹ سے دوبارہ ریٹائرہوگئے

لندن: انگلینڈ کرکٹ ٹیم کے مایہ ناز آل راؤنڈر معین علی نے ٹیسٹ کرکٹ سے دوبارہ ریٹائرمنٹ لے لی۔

اس سے قبل 36 سالہ معین علی 2021 کے سیزن کے اختتام پر ٹیسٹ کرکٹ سے ریٹائر ہو گئے تھے لیکن پھر رواں سال ایشز سیریز سے کچھ دن قبل انگلش سپنر جیک لیچ کی انجری کے بعد انگلینڈ کرکٹ ٹیم کی انتظامیہ کی جانب سے معین علی سے ریٹائرمنٹ واپس لینے کے لیے رابطہ کیا گیا تھا۔

ٹیم انتظامیہ سے رابطے کے بعد معین علی نے ٹیسٹ کرکٹ سے اپنی ریٹائرمنٹ واپس لیتے ہوئے آسٹریلیا کے خلاف ایشز سیریز میں شرکت کی۔ انگلینڈ ٹیم نے ایشز سیریز کے آخری ٹیسٹ میچ میں آسٹریلیا کو 49 رنز سے شکست دے کر سیریز 2-2 سے برابر کر دی۔

اس میچ میں معین علی نے پہلی اننگز میں 34 اور دوسری اننگز میں 29 رنز سکور کیے جبکہ آسٹریلیا کی دوسری اننگز میں انہوں نے کھیل کے آخری دن 3 وکٹیں حاصل کر کے اپنی ٹیم کو سیریز برابر کرنے میں مدد کی۔میچ جیتنے کے بعد برطانوی میڈیا کو انٹرویو دیتے ہوئے معین علی نے کہا کہ میں اب ٹیسٹ کرکٹ سے ریٹائر ہو چکا ہوں،اگر کپتان بین سٹوکس نے ٹیسٹ کرکٹ کھیلنے کیلئے مجھے دوبارہ میسج کیا تو میں اسے ڈیلیٹ کر دوں گا۔

معین علی نے کہا کہ میں نے واقعی ٹیسٹ کرکٹ سے بہت لطف اٹھایا ہے اور اسے جیت کے ساتھ ختم کرنا اچھا لگا ہے۔معین علی نے حالیہ ایشز کے 4 ٹیسٹ میچز میں مجموعی طور پر 180 رنز بنائے اور 9 وکٹیں حاصل کیں۔برطانوی آل راؤنڈر کے ٹیسٹ کرکٹ پر نظر ڈالی جائے تو انہوں نے 68 ٹیسٹ میچز میں 5 سنچریوں کی مدد سے 3094 رنز بنائے اور 204 وکٹیں حاصل کیں۔معین علی کو 68 ٹیسٹ،129 ایک روزہ اور 74 ٹی ٹونٹی میچز میں انگلینڈ کی نمائندگی کا اعزاز حاصل ہے۔