اسلاموفوبیا کے خاتمے کیلئے اجتماعی کاوشوں کی ضرورت ہے : وزیراعظم

تفصیلات کے مطابق  وزیر اعظم  عمران خان نے اسلام آباد میں مقیم او آئی سی سے تعلق رکھنے والے ممالک کے سفرا سے ملاقات میں اسلاموفوبیا سے نمٹنے اور بین المذاہب ہم آہنگی کے فروغ سے متعلق تبادلہ خیال کیا۔ وزیراعظم   نے ملاقات میں کہا  کہ دنیامیں اسلاموفوبیامیں اضافہ ہورہاہے ، ہم مغربی اور مسلم دنیا میں خلا کو کم کرنا چاہتے ہیں، مغربی دنیا میں مذہب کو مذہب کی طرح نہیں سمجھا جاتا، مغربی دنیاکو بتاناچاہتےہیں کہ حضورﷺہمارےدلوں میں رہتےہیں  ۔ ان کے خلاف کوئی بات برداشت نہیں کریں گے، مغربی دنیا کو بے حرمتی پر جواب دینا ہوگا۔

وزیراعظم نے کہا کہ پاکستان دنیا میں برداشت کے فروغ میں تعاون کیلئے پرعزم ہے اور بین المذاہب ہم آہنگی کیلئے کوششیں کررہاہے، اسلاموفوبیا سے بین المذاہب نفرت کو ہوا ملتی ہے جبکہ شدت پسندی کو اسلام سے جوڑنے سے عالمی سطح پر مسلمان متاثر ہوتے ہیں۔  ان کا مزید کہنا تھا کہ دہشت گردی اور انتہا پسندی کا کوئی مذہب نہیں ہوتا، کوئی ایک مسلمان دہشت گردی میں ملوث ہو تو الزام تمام مسلمانوں پر آتا ہے ، اوآئی سی ہی اس مسئلے پر کام کرسکتی ہے کوئی اور نہیں، تمام مسلمان ریاستوں کو مل کر کام کرنا ہوگا۔ وزیراعظم نے کہاکہ اظہاررائے کی آزادی کے حق کے نام پراسلامی احکامات اورمذہبی شخصیات کی توہین سے دنیابھرمیں ڈیڑھ ارب مسلمانوں کے جذبات کوٹھیس پہنچ رہی ہے۔

انہوں نے اس موقع پر گزشتہ سال عالم اسلام کے رہنماؤں کو تحریر کردہ اپنے دو خطوط کا ذکر کرتے کہا کہ  پاکستان نے اسلام مخالف پراپیگنڈے کے بارے میں عالمی سطح پرآگہی پیدا کرنے کی کوشش کی ہے انہوں نے باہمی احترام کو فروغ دینے کے لئے عالمی برادری کے ساتھ مذاکرات کے عزم کااعادہ کیا۔ وزیراعظم نے تمام مذاہب کے افراد کی دل آزاری روکنے کے لئے اقدامات پرزور دیتے ہوئے کہا  کہ او آئی سی کو اسلام کا حقیقی تشخص اجاگر کرنے اور امن و برداشت کے لیے اس کے پیغام کو عام کرنے کے لیے اجتماعی کوششیں کرنے کی ضرورت ہے۔