سعودی کلب الہلال کا برازیلین فٹبالر نیمار سے معاہدہ طے پاگیا

جدہ: سعودی فٹ بال کلب الہلال کا برازیلین معروف فٹ بالر نیمار سے معاہدہ ہوگیا ہے جس کے تحت نیمار اب الہلال کلب کی نمائندگی کریں گے۔ پیرس سینٹ جرمین سے برازیل کے شہرہ آفاق فٹ بالر اور فارورڈ نیمار نے سعودی کلب الہلال سے معاہدے پر دستخط کی تصدیق کر دی ہے۔31 سالہ نیمار نے سعودی کلب الہلال کی نمائندگی کا باقائدہ اعلان کر دیا ہے۔

دونوں کے درمیان معاہدہ تقریباً 90 ملین یورو میں طے پایا ہے۔نیمار نے الہلال کی طرف سے جاری کردہ ایک مختصر ویڈیو کلپ میں اعلان کیا۔ میں یہاں سعودی عرب میں ہوں، میں ہلال میں ہوں۔ پیرس سینٹ جرمین (پی ایس جی )نے بھی اس اقدام کی تصدیق کرتے ہوئے نیمار کو “کلب لیجنڈ” قرار دیا ہے ۔

نیمار نے 2017 میں عالمی ریکارڈ فیس 200 ملین پائونڈ میں پیرس سینٹ جرمین میں شمولیت اختیار کی تھی۔ نیمار نے کہا کہ میں نے یورپ میں کھیل کر بہت کچھ سیکھا اور حاصل کیا ہے اور خاص وقت کا لطف اٹھایا ہے، لیکن میں ہمیشہ سے ایک عالمی کھلاڑی بننا چاہتا ہوں اور مختلف مقامات پر نئے چیلنجز اور مواقع کے ساتھ خود کو آزمانا چاہتا ہوں۔

الہلال کلب نے نیمار کے ساتھ دو سال کا معاہدہ کیا ہے۔ برازیلین فٹ بالر نیمار آئندہ ہفتے کو الفیحہ کے خلاف شیڈول میچ میں اپنے نئے کلب کے لیے پہلی بار شرکت کریں گے۔نیمار کو 124 بین الاقوامی میچز میں برازیل کی نمائندگی کا اعزاز حاصل ہے۔