شارع فیصل پرآنے والے شیر کے مالک کوعدالت نے 10 لاکھ روپے جرمانہ کردیا

گزشتہ روز شارع فیصل پر شیر کے سرعام سڑک پر مٹر گشت  کرنےکےکیس کی سماعت ایڈیشنل ڈسٹرکٹ اینڈ سیشن جج کی عدالت میں ہوئی۔

گرفتار پانچ ملزمان مالک شمس الحق، یافع، مرتضٰی، نصیر اور عبید کو عدالت میں پیش کیاگیا۔

جج نے برہمی کا اظہار کرتےہوئےکہا کہ  شیرکو لے جانے والی گاڑی کو فوری بند کیا جائے ، عدالت نے شیر کے مالک پر دس لاکھ روپے جرمانہ عائد کرنے کا حکم دے دیا۔

ملزمان کے وکیل نے موقف اختیارکیا کہ شیر 7 ماہ کا بچہ ہے،جس سے نقصان کا خدشہ نہ ہونےکے برابر ہے ، جس پر جج شاہد علی نے ریمارکس دیےکہ اسے پھر آپ کی گود میں بٹھا دیا جائے ؟ وکیل نے کہا یہ گرفتار بیچارے بچے ہیں، جج نے سوال کیا کیا یہ پانچ ماہ کے بچے ہیں؟

ملزم شمس الحق نےعدالت کو بیان میں کہا کہ ہمیں شیر نہیں چاہیے، اس کو وائلڈ لائف کے حوالے کردیں ، عدالت نے کچھوے اور شیرکو قدرتی ماحول فراہم کرنےکی ہدایت کردی اور کیس کا فیصلہ ہونے تک دونوں کو کراچی چڑیا گھر میں رکھنے کا حکم دے دیا۔