اسرائیلی زیر تسلط عرب آبادی میں امام مسجد قتل، فلسطینیوں کا (کل) ہڑتال کا اعلان

مقبوضہ بیت المقدس: اسرائیل کے 1948 عیسوی میں زیرتسلط جانے والے عرب علاقوں میں امام مسجد کو قتل کردیا گیا، جس کے باعث اسرائیل میں عرب عوام کے لیے سپریم فالو اپ کمیٹی اور مقامی اتھارٹیز کے سربراہان کی قومی کمیٹی نےکل(منگل کو )عام ہڑتال کا اعلان کردیا۔ سعودی خبر رساں ادارے کے مطابق امام مسجد شیخ سمیع المصری کے قتل کےخلاف ہڑتال کا فیصلہ گزشتہ روز کفر قرہ میونسپلٹی کے ہیڈ کوارٹرز میں ہونے والے اجلاس کے دوران کیا گیا۔

اجلاس میں بتایا گیا کہ جمعہ اور ہفتہ کے دوران 24 گھنٹوں میں 3 افراد کو قتل کیا گیا۔ اجلاس میں فالو اپ کمیٹی کے ارکان، اس کے چیئرمین محمد براکا، عرب مقامی اتھارٹیز کے سربراہان کے لیے قومی کمیٹی کے سربراہ، وکیل مدثر یونس، کفر قرہ کے میئر فراس بدی، میئرز، سربراہان، تمام سیاسی جماعتوں، مساجد کے امام اور مقبول کمیٹیوں کے رہنمائوں نے شرکت کی۔ فالو اپ کمیٹی کے سربراہ محمد براکا نے امام مسجد شیخ سمیع المصری کے اہل خانہ سے تعزیت کااظہار کیا۔

انہوں نے کہا کہ جرائم کے دائرے کو مزید وسعت دینے کے لیے اسرائیلی آمرانہ سازشوں میں اضافہ ہو رہا ہے۔ انہوں نے بین الاقوامی اداروں سے مطالبہ کیا کہ وہ اسرائیلی حکومت اور اس کی ایجنسیوں کے خلاف اقدامات کریں۔ اجلاس میں وسیع بحث کے بعد کئی فیصلے کیے گئے جن میں عوام سے منگل کو عام ہڑتال کی کال دی گئی۔ تیسرے پیریڈ کے بعد سکولوں کو بھی ہڑتال میں شامل کیا جائے گا اور ایک بڑا مارچ کیا جائے گا۔ فالو اپ کمیٹی نے پیرنٹس کمیٹیوں،

پاپولر کمیٹیوں اور فالو اپ کمیٹی کے اداروں سے بھی مطالبہ کیا کہ وہ ہڑتال کو کامیاب بنانے میں اپنا کردار ادا کریں۔ واضح رہے منظم جرائم کا شکار ہونے والے عرب شہریوں کی اموات کی تعداد 160 سے تجاوز کر گئی ہے جن میں 9 خواتین، 10 بچے اور متعدد علما، دانشور، ماہرین تعلیم اور مقامی حکام شامل ہیں جبکہ 1200سے زائد زیادہ عرب افراد زخمی بھی ہوئے ۔