ایف آئی اے نے لیگی رہنماؤں کے خلاف پولیس کو تحریری درخواست دیدی

تفصیلات کے مطابق فیڈرل انویسٹی گیشن ایجنسی (ایف آئی اے ) نے لیگی رہنماؤں کے خلاف پولیس کو تحریری درخواست دے دی۔ اسسٹنٹ ڈائریکٹر ایف آئی اے نے سی سی پی او لاہور کو درخواست دی۔

درخواست میں کہا گیا ہے کہ  لیگی رہنماؤں نے ایف آئی اے لاہور آفس پر دھاوا بولا اور لاک ڈاؤن کے احکامات کو توڑا۔مریم اورنگزیب،  عطاء تارڑ، میاں مرغوب، غزالی بٹ اور 12 نامعلوم افراد کےخلاف درخواست دی گئی ہے۔

درخواست میں کہا گیا ہے کہ  ملوث افراد کے خلاف قانونی کارروائی کی جائے، مسلم لیگی رہنماؤں نے دفتر میں گھس کر تلاشی لی۔این سی او سی کی ہدایات کے مطابق آج دفاتر بند تھے۔ لیگی رہنماؤں اور کارکنوں نے کورونا ایس او پیز کی خلاف ورزی بھی کی۔

خیال رہے کہ  مسلم لیگ ن کے صدر اور قومی اسمبلی میں اپوزیشن لیڈر شہباز شریف لندن کیلئے روا نہ ہوسکے تھے ، لاہور ائیرپورٹ پر انہیں بیرون ملک جانے سے روک دیا گیا تھا۔ ائیر پورٹ پر امیگریشن حکام کا شہباز شریف سے کہنا تھا کہ ہمارے سسٹم میں آپ ابھی تک بلیک لسٹ ہیں اور سسٹم میں کلیئرنس جاری نہیں ہوئی جس کے بعد نجی ایئر لائن نے شہباز شریف کو آف لوڈ کر دیا۔

واضح رہے کہ  گزشتہ روز لاہور ہائیکورٹ نے شہبازشریف کو علاج کی غرض سے 8ہفتے کیلئے بیرون ملک جانے کی مشروط اجازت دی تھی۔