مذہبی عدم برداشت انسانی حقوق کی خلاف ورزی ہے،سیکرٹری جنرل اقوام متحدہ

اقوام متحدہ کے سیکرٹری جنرل انتونیو گوتریش نے بھارت میں مسلمانوں اور مسیحی برادری کے خلاف حالیہ حملوں پر تبصرہ کرتے ہوئے کہا ہے کہ مذہبی منافرت مکمل طور ناقابل قبول ہے۔

نئی دہلی میں جی 20سربراہی اجلاس میں شرکت کے بعد نیویارک واپس آنے پر پریس کانفرنس کے دوران بھارت میں ہندو انتہا پسندوں کی جانب سے اقلیتوں کے خلاف حالیہ تشدد بارے گفتگو کرتے ہوئے انہوں نے کہا کہ بھارتی وزیراعظم نریندر مودی کے ساتھ کوئی ملاقات نہیں کی اور نہ ہی دوطرفہ تعلقات کے حوالے سے ملاقات کی لیکن ہمارا موقف واضح ہے کہ مذہبی عدم برداشت انسانی حقوق کی خلاف ورزی ہے جو مکمل طور پر ناقابل قبول ہے۔

My appeal to world leaders at #UNGA next week is clear:

This is not a time for posturing or positioning.

This is not a time for indifference or indecision.

This is a time to come together for real, practical solutions. pic.twitter.com/3Tl7qOyiQ7

— António Guterres (@antonioguterres) September 13, 2023

انہوں نے اپنے افتتاحی ریمارکس میں آئندہ ہفتے ہونے والے اقوام متحدہ کی جنرل اسمبلی کے اعلی سطح کے اجلاس کے حوالے سے عالمی سربراہان کے لیے واضح پیغام میں کہا کہ یہ وقت دکھاوے یا بیانات دینے کا نہیں بلکہ عملی اقدامات کا ہے۔ایسے اقدامات جس کی دنیا کو بہتر بنانے کے لیے ضرورت ہے۔

سیکرٹری جنرل نے کہا کہ یہ وقت بے حسی یا خاموش بیٹھنے کا نہیں ہے بلکہ یہ حقیقی اور عملی حل کے لیے اکٹھے ہونے کا وقت ہے۔یہ وقت بہتر مستقبل کے لیے اقدامات پر سمجھوتہ کرنے کا ہے، جیسا کہ سیاست ، سفارت کاری اور موثر قیادت پر سمجھوتا۔ انہوں نے مراکش اور لیبیا میں حالیہ دنوں میں ہوانے والے واقعات کے حوالے سے کہا کہ اقوام متحدہ امدادی سرگرمیوں کے لیے متحرک ہے۔