فیصل آباد میں پیٹرول کی اسمگلنگ کے خلاف کریک ڈاؤن

فیصل آباد: فیصل آباد میں سول ڈیفنس حکام نے شہر میں اسمگل شدہ پیٹرول کی فروخت روکنے کے لیے کریک ڈاؤن کرتے ہوئے 240 منی پیٹرول پمپس کو ختم کردیا۔

دیگر شہروں کی طرح فیصل آباد میں بھی سول ڈیفنس حکام اسمگل شدہ پیٹرول کی فروخت میں ملوث مافیا کے خلاف کریک ڈاؤن کر رہے ہیں۔

سول ڈیفنس اتھارٹیز نے دعویٰ کیا ہے کہ کریک ڈاؤن کے دوران 95 فیصد غیر قانونی پیٹرول کی فروخت کو ختم کردیا گیا ہے۔

حکام کے مطابق غیر قانونی پیٹرو کی فروخت کے خلاف آپریشن کے دوران 240 مشینیں، 85 دکانیں سیل اور 42 فلنگ اسٹیشنز ضبط کرلئے گئے۔

فیصل آباد کی ضلعی انتظامیہ کا کہنا ہے کہ 350 غیر قانونی پیٹرول سیلنگ پوائنٹس کو ختم کر دیا گیا ہے تاہم کام مکمل طور پر بند ہونے تک کریک ڈاؤن جاری رہے گا۔

دوسری جانب شہریوں کا کہنا تھا کہ انتظامیہ نے اس غیر قانونی سرگرمی کو روکنے میں کافی دیر لگا دی ہے لیکن اب اسے منطقی انجام تک پہنچایا جائے۔