پٹرولیم مصنوعات میں کمی، اونٹ کے منہ میں زہرہ کے مترادف، ترجمان پی ٹی آئی

پاکستان تحریک انصاف نے پٹرولیم مصنوعات کی قیمتوں میں کمی کو محض علامتی، نہایت ناکافی اور اونٹ کے منہ میں زیرہ کے مترادف قرار دے دیا

ایکس پر پاکستان تحریک انصاف کے ترجمان کا کہنا تھا کہ جب پی ٹی آئی کی حکومت کیخلاف سازش کی گئی تھی تب  پٹرول 149 روپے فی لیٹر میں دستیاب تھا، پچھلے سترہ ماہ کے دوران پٹرول اور ڈیزل کی قیمتوں میں دوگنا سے بھی زیادہ اضافہ کیا گیا، نگران حکومت نے بھی پی ڈی ایم کی طرح پٹرول مہنگا کرنے کی روش برقرار رکھی۔

نگران حکومت کی جانب سے پٹرولیم مصنوعات کی قیمتوں میں علامتی کمی کا معاملہ

پاکستان تحریک انصاف نے پٹرولیم مصنوعات کی قیمتوں میں کمی کو محض علامتی، نہایت ناکافی اور اونٹ کے منہ میں زیرہ قرار دے دیا :

تحریک انصاف کی حکومت کیخلاف سازش کی گئی تو پٹرول 149 روپے فی لیٹر میں دستیاب…

— PTI (@PTIofficial) October 1, 2023

پارٹی ترجمان نے کہا کہ پٹرولیم مصنوعات کی قیمتوں میں ناقابلِ برداشت اضافے سے ملک بدترین مہنگائی کی لپیٹ میں ہے اور عوام کیلئے اشیائے خورونوش سے لےکر دیگر ضروریاتِ زندگی کو جائز ذرائع سے پورا کرنا ناممکن ہورہا ہے، ملک کی  تباہ حال معیشت سے کاروبار اور ذرائع آمدن نہایت تیزی سے سکڑ رہے ہیں اور دوسری جانب دہشتگردی ایک قومی مسئلہ بن کر ابھررہی ہے اور معصوم شہریوں کو غیرمحفوظ اور خوفزدہ کررہی ہے۔

پی ٹی آئی ترجمان نے مزید کہا کہ بدقسمتی سے نگران حکومت اور ریاستی کارندے سارا زور تحریک انصاف اور اس کے حامی شہریوں کیخلاف ظلم و جبر کا بازار گرم کرنے میں لگا رہے ہیں، آئین، قانون، جمہوریت اور سیاست کو فتح کرنے کا خبط ریاست اور عوام کیلئے تباہی و بربادی کا پیش خیمہ بن رہا ہے، نگران حکومت صورتحال کی نزاکت کا احساس کرے اور فیصلہ سازی عوام کی منتخب قیادت کے سپرد کرنے کیلئے فوری طور پر شفاف انتخاب کا انعقاد یقینی بنائے