ملک بھر میں آج عید الفطر مذہبی عقیدت واحترام اور سادگی سے منائی جا رہی ہے

آج ملک بھرمیں عیدالفطر مذہبی عقیدت واحترام کے ساتھ منائی جارہی ہے۔ملک کے تمام بڑے شہروں اورقصبوں میں کھلے مقامات، مساجد اورعیدگاہوں میں عید کے بڑے اجتماعات ہوئے۔علماء کرام اپنے خطبات میں عیدالفطر کی اہمیت اور فلسفے پرروشنی ڈالی ۔کراچی، اسلام آباد، پشاور اور کوئٹہ سمیت ملک کے تمام چھوٹے بڑے شہروں میں مساجد، عیدگاہوں اور کھلے میدانوں میں نماز عید کے اجتماعات میں امت مسلمہ، مقبوضہ کشمیر،فلسطین سمیت ملک کی ترقی و خوشحالی اور کورونا وبا کے خاتمے کے لئے خصوصی دعائیں مانگی گئیں۔ کورونا سے بچاؤ کی حفاظتی تدابیرکے تحت  ملک بھرکی مساجد،امام بارگاہوں اورعید گاہوں میں نمازعید الفطرکی ادائیگی جاری ہے۔

کراچی میں نماز عید کا سب سے بڑا اجتماع پولو گراؤنڈ (باغ جناح) میں ہوا۔لاہور کے باغ جناح میں عید کا پہلا بڑا اجتماع صبح 6 بجے منعقد ہوا، نمازِ عید کا سب سے بڑا اجتماع بادشاہی مسجد میں منعقد ہوا، جس میں گورنر پنجاب سرور چوہدری سمیت شہریوں کی بڑی تعداد نے شرکت کی جبکہ شہر کے دیگر مقامات پر بھی مختلف چھوٹے بڑے اجتماعات ہوئے۔

واضح رہے کہ پاکستان اور سعودی عرب سمیت دنیا کے بیشتر ممالک میں آج عید الفطر منائی جارہی ہے۔