قومی اسمبلی کو آج (جمعہ) بتایا گیا کہ وفاقی حکومت رواں مالی سال کے دوران بتیس ڈیموں کی تعمیر کے لئے رقم فراہم کررہی ہے۔

آبی وسائل کے وزیر مصدق ملک نے وقفہ سوالات کے دوران ایوان کو بتایا کہ مکمل ہونے پر ان منصوبوں میں تقریباً 84 لاکھ انتیس ہزار دو سو اٹھاسی ایکڑ فٹ پانی ذخیرہ کرنے کی گنجائش ہوگی اور 4 لاکھ 36 ہزار 934 ایکڑ رقبہ زیر کاشت آئے گا۔

وزیر اطلاعات و نشریات عطا اللہ تارڑ نے ایوان کو بتایا کہ وزیر اعظم شہباز شریف نے نیشنل ووکیشنل اینڈ ٹیکنیکل ٹریننگ کمیشن کو ہدایت کی ہے کہ نرسوں کو عالمی معیار کے مطابق تربیت فراہم کریں۔ انہوں نے کہا اس سے پاکستان مقامی طور پر اور بیرون ملک نرسوں کی طلب کو پورا کرنے کے قابل ہوجائے گا۔

سعودی عرب میں عہدے کے ناجائز استعمال، جعلسازی اور رشوت لینے کے الزامات میں سابق آئی جی پولیس کو 20 سال قید کی سزا سنا دی گئی۔ 

دارالحکومت ریاض سے سعودی وزارت داخلہ کے مطابق عدالت نے سابق آئی جی پولیس جنرل خالد بن قرار الحربی پر ڈیڑھ کروڑ ریال جرمانہ بھی عائد کیا ہے۔ 

سعودی وزارت داخلہ کے مطابق تحقیقات میں سابق انسپکٹر جنرل پر عائد تمام الزامات ثابت ہوئے۔

یوکرین کے پائلٹوں کے پہلے گروپ نے رواں ہفتے رومانیہ کے علاقائی مرکز میں اپنی ایف 16 لڑاکا طیاروں کی تربیت شروع کر دی ہے۔
2022 میں روس کے یوکرین پر حملے کے بعد سے کیف اپنی فضائیہ کو بڑھانے کی کوشش کر رہا ہے اور مغرب سے جدید فوجی طیارے عطیہ کرنے اور فرانس سمیت نیٹو ممالک میں تربیت کے لیے پائلٹ بھیجنے کا مطالبہ کر رہا ہے۔

رومانیہ نے نومبر 2023 میں اپنے فیٹیسٹی ایئر بیس پر ایف -16 کی تربیت کے مرکز کا افتتاح کیا ، جس میں یوکرین کے پائلٹوں کو بھی تربیت دینے کا وعدہ کیا گیا تھا۔

رومانیہ کی وزارت دفاع کے ترجمان کونسٹانٹین اسپینو نے خبر رساں ادارے کو بتایا کہ یوکرین کے پہلے چار پائلٹ اس ہفتے کے اوائل میں پہنچے تھے اور انہوں نے اپنی تربیت شروع کر دی ہے۔

ان کا کہنا تھا کہ عملی تربیت سال کے آخر تک شروع کی جا سکتی ہے۔

یوکرین کے وزیر دفاع رستم عمروف نے سوشل میڈیا پر اس پروگرام کا خیرمقدم کرتے ہوئے کہا کہ اس سے اس بات کو یقینی بنایا جائے گا کہ یوکرین کی فضا میں مزید ایف 16 طیارے موجود ہوں۔

ان طیاروں کی دیکھ بھال اس کی امریکی مینوفیکچرر لاک ہیڈ مارٹن کرتی ہے، جو تربیت بھی فراہم کرتی ہے۔

فیٹیسٹی مرکز دارالحکومت بخارسٹ سے تقریبا 150 کلومیٹر کے فاصلے پر واقع ملک کے فضائی اڈے کا حصہ ہے اور اس کا افتتاح نیدرلینڈز کے ساتھ متعدد ایف 16 طیاروں کو تربیت کے لیے دستیاب کرانے کے معاہدے کے بعد کیا گیا تھا۔

رومانیہ کی فوج کے پاس مجموعی طور پر 26 ایف 16 طیارے ہیں جن میں سے 17 پرتگال اور 9 ناروے سے خریدے گئے تھے۔

ناروے 2025 کے آخر تک رومانیہ کو مزید 23 لڑاکا طیارے فراہم کرے گا۔