انتخابی عمل کی ڈور میں کوئی جانبداری نہیں ہے، نگران وزیر اطلاعات

نگراں وفاقی وزیر اطلاعات و نشریات مرتضی سولنگی نے کہا ہے کہ اب عام انتخابات کے حوالے سے کسی کو کوئی شبہ نہیں ہونا چاہیے ، انتخابی عمل کو صاف ،شفاف یقینی بنانا نگراں حکومت کی ذمہ داری ہے ، ہم اپنی ذمہ داری پوری ایمانداری کے ساتھ نبھا رہے ہیں ، میڈیا کا کردار انتہائی اہم ہے ،صحافیوں کا کام خبر دینا ہے، کسی بھی سیاسی جماعت یا امیدوار کی جانب جھکائو پیدا کرنا نہیں ہے ۔

 نیشنل پریس کلب ، یونیسکو اور آئی آر اے ڈی اے کے اشتراک سے صحافیوں کے خلاف تشدد ، انتخابات کی شفافیت ، عوامی قیادت کے کردار کے حوالے سے سیمینار سے خطاب کرتے ہوئے مرتضی سولنگی نے کہا کہ صحافی جمہوریت ، آئین ، قانون کی حکمرانی کے ساتھ ہیں ، انتخابی عمل کی ڈور میں کوئی جانبداری نہیں ہے ،اسی طرح نگراں حکومت کی ذمہ داری ہے کہ وہ اس ڈور میں کسی جماعت یا امیدوار کی طرف داری یا مخالفت نہ کرے ۔

انہوں نے کہا کہ صحافیوں کے لئے بھی ضروری ہے کہ وہ انتخابی عمل کی ایماندارانہ رپورٹنگ کریں ، یہ نظر نہ آئے کہ ان کا جھکائو ایک جماعت یا امیدوار کی طرف ہے ۔ صحافیوں کا کام خبر دینا ہے ،یہ افسوسناک ہے کہ آپ خبر بن جائیں ، جان محمد مہر کے واقعہ پر بھی میری وزیراعلی سندھ سے بات ہوئی ہے ، ایسے واقعات ریاست یا حکومت کے لئے فخر کی بات نہیں ہوتی ۔

انہوں نے کہا کہ اب کسی کو کوئی شبہ نہیں ہونا چاہیے ، ہم نے پہلے دن ہی کہا تھا کہ انتخابات الیکشن کمیشن کی ذمہ داری ہے ، آئین اور قانون کے تحت ذمہ داری الیکشن کمیشن پوری کررہا ہے، حلقہ بندیوں کا مرحلہ آخری مرحلے میں داخل ہوچکا ہے ، ہم سب کی کوشش ہونی چاہیے کہ آئندہ الیکشن سے متعلق حقائق لوگوں تک پہنچائیں اور لوگوں کے مسائل کو بھی اجاگر کریں ۔