اسرائیل اورحزب اللہ کےدرمیان جنگ بندی معاہدے کےباوجود بھی اسرائیل کےلبنان پر حملے جاری ہیں جب کہ حزب اللہ بھی جوابی کارروائیاں جاری رکھےہوئے ہے۔

عرب میڈیا کے مطابق گزشتہ ہفتے ہونےوالے جنگ بندی معاہدے کے باجود  اسرائیل اور حزب اللہ ایکدوسرے پر معاہدے کی خلاف ورزی کے الزامات لگاتے ہوئےحملے کررہے ہیں۔

گزشتہ روزاسرائیلی فوج کی جانب سے جنوبی لبنان میں جنگ بندی معاہدے کی متعدد خلاف ورزیوں کے بعد حزب اللہ نے بھی اسرائیل پرجوابی حملہ کیا جس کا جواب اب اسرائیل نے لبنان میں بمباری کی صورت میں دیا۔

رپورٹ کےمطابق اسرائیل کی جانب سے لبنان پر کی گئی تازہ بمباری میں 11 لبنانی شہری جاں بحق اور متعدد زخمی ہوئے۔

اسرائیل اورحزب اللہ کےدرمیان 60 روزہ جنگ بندی معاہدہ گزشتہ ماہ ہوا تھا جو 27 نومبر سےنافذالعمل ہوا تھا۔

واضح رہے کہ سعودی عرب کےدورہ پرآئے ہوئے فرانسیسی صدر میکرون اور سعودی ولی عہد محمد بن سلمان نےغزہ میں بغیر کسی تاخیر کے جنگ بندی کی کوششوں پر زور دیا تھا ۔ 

دوسری جانب اسرائیلی فوج کی غزہ پربھی بمباری جاری ہے جس میں گزشتہ 24 گھنٹوں میں مزید 50 فلسطینی شہید ہو گئے۔

پاکستان اور ایران نے تمام شعبوں میں تعاون کو فروغ دینے پر اتفاق کیا ہے۔

اس حوالے سے اتفاق رائے ایران کے شہر مشہد میں ای سی او کی وزرا کونسل کے اجلاس کے موقع پر نائب وزیراعظم اسحق ڈار اور ایران کے وزیر خارجہ عباس عرقچی کے درمیان ملاقات میں ہوا۔

انہوں نے ملاقات کے دوران باہمی دلچسپی کے شعبوں اور حالیہ علاقائی اور عالمی صورتحال پر بھی تبادلہ خیال کیا۔

وزیراعظم محمد شہباز شریف کی آج (منگل کو ) ریاض میں ون واٹر سربراہی اجلاس کے موقع پر فرانس کے صدر ایمانوئل میکرون سے دو طرفہ ملاقات ہوئی۔

وزیراعظم نے ریاض میں ون واٹر سمٹ کی کامیاب مشترکہ میزبانی پر صدر میکرون کو مبارکباد دی۔ موسمیاتی تبدیلی اور ترقیاتی امور پر فرانس کے قائدانہ کردار کو سراہتے ہوئے وزیراعظم نے 2022 کے تباہ کن سیلاب کے تناظر میں صدر میکرون کی پاکستانی عوام کے لیے بھرپور حمایت کو سراہا۔

وزیراعظم نے دونوں ممالک کے درمیان باہمی طور پر مفید اقتصادی اور تجارتی تعلقات کو مزید مضبوط بنانے کی ضرورت پر زور دیا اور فرانس کو پاکستان میں سرمایہ کاری کے مواقع بالخصوص موسمیاتی موافقت اور قابل تجدید توانائی سے استفادہ حاصل کرنے کی دعوت دی۔

دونوں رہنماؤں نے پاکستان اور فرانس کے مابین زراعت، لائیو سٹاک، انفارمیشن ٹیکنالوجی، پیشہ ورانہ مہارتوں میں ترقی اور پینے کے صاف پانی کے شعبوں میں بزنس ٹو بزنس روابط کے ذریعے تعاون بڑھانے پر اتفاق کیا۔

دونوں رہنماؤں نے پاکستان فرانس تعلقات کی مثبت سمت پر اطمینان کا اظہار کرتے ہوئے مختلف شعبوں بشمول سیاسی، اقتصادی، تجارتی اور سرمایہ کاری کے ساتھ ساتھ اقوام متحدہ سمیت کثیرالجہتی فورمز پر تعاون پر تبادلہ خیال کیا۔

دونوں رہنماؤں نے باہمی دلچسپی کے تمام علاقائی اور عالمی مسائل کے حوالے سے روابط کو مزید فروغ دینے کی مشترکہ خواہش کا بھی اعادہ کیا۔