چیف الیکشن کمشنر سے نگران وزیر اعلی خیبر پختونخوا کی ملاقات

چیف الیکشن کمشنر سکندر سلطان راجہ سے نگران وزیر اعلی خیبر پختونخوا نے الیکشن کمیشن سیکرٹریٹ اسلام آباد میں ملاقات کی۔

چیف الیکشن کمشنر سکندر سلطان راجہ نے ملاقات میں اس امر پر زور دیا ہے کہ صوبہ میں موجودہ سکیورٹی کی صورتِ حال کو مدنظر رکھتے ہوئے عام انتخابات کے پر امن انعقاد کے لیے ضروری اقدامات کیے جائیں جس میں ووٹرز کے تحفظ کو اولین فوقیت دی جائے۔

نگران وزیرِ اعلی نے چیف الیکشن کمشنر کو صوبے میں انتخابات کی تیاریوں پر بریفنگ دی اور یقین دہانی کرائی کہ خیبر پختونخوا کی صوبائی حکومت الیکشن کمیشن کے ساتھ مل کر صوبے میں آزادانہ، منصفانہ اور غیر جانبدارانہ انتخابات کا انعقاد یقینی بنائےگی۔

چیف الیکشن کمشنر نے نگران وزیرِ اعلی کو عہدہ سنبھالنے پر مبارک باد دی۔ سکندرسلطان راجہ نے نگران وزیرِ اعلی ٰکو بتایا کہ خیبر پختونخوا میں انتخابات کی تیاریوں کا جائزہ لینے کے لیے جلد ہی الیکشن کمیشن صوبے کا دورہ کرے گا جس میں تمام تیاریوں کو بغور دیکھا جائےگا