خیبر پختونخوا میں پبلک سروس کمیشن کے ٹیسٹ میں الیکٹرانک آلات کے استعمال کا انکشاف

خیبر پختونخوا میں ایم ڈی کیٹ ٹیسٹ میں نقل کے بعد پبلک سروس کمیشن کے ٹیسٹ میں بھی جدید طریقے سے نقل کرنے کا انکشاف ہوا ہے۔ انجینئر کی پوسٹ کے ٹیسٹ میں 18 امیدواروں پر الیکٹراانک آلات اور ماسٹر کارڈ کا استعمال ثابت ہوا ہے۔

خیبرپختونخوا پبلک سروس کمیشن کی زیر نگرانی گریڈ 17 کے لئے ٹیسٹ میں امیدوار نقل کرتے پکڑے گئے۔

پبلک سروس کمیشن کے نوٹس کے مطابق محکمہ آبپاشی، سی این ڈبلیو میں ملازمت کے لئے منعقدہ امتحان میں 18 امیدوار نقل کرتے ہوئے رنگے ہاتھوں پکڑے گئے۔ 

نقل کرنے والوں امیدواروں سے الیکٹرانک ڈوائسز، گائیڈ اور نقل کے دوسرے مواد برآمد کیے گئے ہیں، کارروائی وزیراعظم پورٹل پر شکایت کے بعد کی گئی ہے۔

کمیشن حکام کا کہنا ہے کہ رنگے ہاتھوں پکڑے جانے والے امیدواروں کے پرچے کینسل کردیے گئے ہیں اور انکوائری کے بعد 18 امیدواروں پر الزام ثانت ہونے پر 3 سال تک پابندی عائد کر دی گئی ہے۔