بٹ کوائن کی قیمت میں اچانک کمی کی وجہ سامنے آگئی

غیر ملکی خبر رساں ادارے کے مطابق  الیکٹرک  کار بنانے والی کمپنی ٹیسلا کے کرپٹو کرنسی بٹ کوائن کو وصول کرنے سے انکار کے بعد بٹ کوائن کی قیمت میں کمی ہوگئی ہے۔ بٹ کوائن کی قیمت میں 10 فیصد سے زائد کی کمی ہوگئی، جب کہ ٹیسلا کےحصص کی قیمتیں بھی گر گئیں ہیں۔

کمپنی  اسپیس ایکس اور ٹیسلا کے سی ای او ایلون مسک نے ایک ٹویٹ میں کہا ہے کہ  ماحولیاتی تحفظات کے پیش نظر ہم نے ادائیگیوں کے لیے بٹ کوائن وصول کرنا بند کردیا ہے اور اب صارفین بٹ کوائن کی مدد سے ٹیسلا نہیں خرید سکتے۔

Energy usage trend over past few months is insane https://t.co/E6o9s87trw pic.twitter.com/bmv9wotwKe

— Elon Musk (@elonmusk) May 13, 2021

ایلون مسک نے مزید کہا ہے کہ بٹ کوائن کی مائننگ اورٹرانزیکشن میں فاسل فیولز خصوصاً کوئلے کے بڑھتے ہوئے استعمال پر ہمیں تحفظات ہیں، کرپٹو کرنسی اچھا آئیڈیا ہے، لیکن اسے ماحولیاتی نقصان کے ساتھ نہیں لایا جاسکتا۔

انہوں نے مزید کہا کہ ٹیسلا اپنے بٹ کوائن فروخت نہیں کرے گی اور نہ ہی  ہمارا ارادہ انہیں ابھی  استعمال کرنے کا ہے، جب تک اس کی مائننگ زیادہ سسٹین ایبل انرجی پر منتقل نہیں ہوجاتی۔

خیال رہے کہ  ٹیسلا نے رواں سال اعلان کیا تھا کہ اب ٹیسلا کی گاڑیوں کو بٹ کوائن کی مدد سے خریدا جاسکتا ہے۔

اس سے ایک ماہ قبل ٹیسلا نے ڈیڑھ ارب ڈالر کے بٹ کوائن خریدنے کا بھی انکشاف کیا تھا تاہم ایلون مسک کی ٹویٹ کے بعد ٹیسلا پھر اپنی ڈگر پر واپس آگئی ہے۔