غزہ:سیکڑوں فلسطینی اسرائیلی بمباری سے زخمی، ہسپتالوں میں جگہ کم پڑ گئی

غیر ملکی خبر رساں ادارے کے مطابق   غزہ کے  ہسپتالوں  میں وارڈز کے علاوہ کوریڈورز اور انتظامی دفاتر میں بھی اضافی بستر  لگا دیئے گئے ہیں۔ غزہ میں بجلی کے  بحران کی وجہ سے بھی ہسپتال مشکلات کا شکار،صرف ایک سے تین گھنٹے کے لیے بجلی دستیاب ہے۔ غزہ کے ہسپتالوں میں بجلی کے بحران کے باعث جنریٹرز چلائے گئے لیکن ایندھن کم پڑ گیا۔

دوسری جانب  غزہ پر بمباری رکوانے کے لیے مصر کی سر توڑ کوششیں جاری ہیں  لیکن  اسرائیل نے  جنگ بندی کی ہر تجویز مسترد کردی ہے۔

مصر کے وزر خارجہ سامح  شکری نے امن کوششوں کے لیے اردن، روس، سعودی عرب اور امریکا کے رہنماؤں کو لاتعداد فون کالز کیں ۔مصر پہلے بھی اسرائیل فلسطین تنازعات میں امن کے لیے اہم کردار ادا کرتا رہا ہے۔

مصر نے زخمی فلسطینیوں کے علاج کے لیے صحرائے سینا کے ہسپتال خالی کردیئے، ایمبولینسز روانہ کردی گئیں ۔مصری ایمبولینسز  لڑائی میں شدت کی وجہ سے فلسطین داخل ہونے اور زخمیوں کو لانے میں ناکام، بارڈر پر طویل انتظار کرنا پڑ رہا ہے۔

گزشتہ روز اسرائیل کی جانب سے غزہ پر کم از کم 70 فضائی حملے کیے گئے ہیں ،  اسرائیل کی وحشیانہ بمباری سے غزہ جل رہا ہے۔ اتوار کودو  رہائشی عمارتوں  کو ملبے کا ڈھیر بنا دیا گیا ، حملوں میں کم ازکم   42فلسطینی شہید اور متعدد زخمی ہوگئے تھے۔ ملبے سے کئی بچوں کی لاشیں نکالنے کے لرزہ خیز مناظر سامنے آئے، ایک بچی 24 گھنٹوں بعد زندہ نکال لی گئی۔

آج بھی اسرائیل کی جانب سے شدید بمباری  کی گئی ،  یہ 2014 میں ہونے والے بمباری کے بعد غزہ کا سب سے زیادہ شدید فضائی حملہ بتایا جاتا ہے۔