وزیراعظم کی جمعہ کوسرکاری طور پر یوم احتجاج منانے کی ہدایت

تفصیلات کے مطابق وزیراعظم عمران خان کی زیرصدارت حکومتی رہنماؤں اور ترجمانوں کا اجلاس ہوا ، جس میں وفاقی وزرا، معاونین اور وزارت خارجہ کے حکام نے شرکت کی۔

ذرائع کا کہنا ہے کہ اجلاس میں آئندہ جمعہ کو اسرائیلی بربریت کیخلاف سرکاری سطح پر یوم احتجاج کی تجویز دی گئی، جس پر وزیراعظم نے جمعہ کوسرکاری طور پر یوم احتجاج منانے کی تیاری کی ہدایت کردی۔

اجلاس میں شہباز شریف کیس میں دائر اپیل پر بھی بریفنگ دی گئی ، جس پر وزیراعظم نے کہا شہباز شریف کیخلاف اربوں روپے کی کرپشن کےکیسز ہیں، کسی سے ذاتی مسئلہ نہیں لیکن قومی دولت لوٹنےوالوں کونہیں چھوڑاجا سکتا۔

عمران خان کا کہنا تھا کہ قانون کی حکمرانی کے لیے کسی بھی حد تک جائیں گے،احتساب کا عمل اور قانون کی حکمرانی کی جدوجہد جاری رہے گی۔

اجلاس میں معاشی ٹیم نے بریفنگ میں بتایا کہ کورونا وبا کے باوجود ہمارے معاشی اعشاریے مثبت ہیں، برآمدات اور ترسیلات زر میں مسلسل اضافہ ہورہا ہے، اس وقت مہنگائی پوری دنیا کا مسئلہ ہے تاہم پاکستان میں مہنگائی دیگر ممالک کی نسبت کم ہے جبکہ خطے میں سب سے کم پیٹرولیم مصنوعات کی قیمتیں پاکستان میں ہیں۔

وزیراعظم نے کہا حکومت مہنگائی میں کمی کیلئےہر ممکن انتظامی اورپالیسی فیصلے کررہی ہے اور ہدایت کی کہ مثبت معاشی اعشاریوں کافائدہ براہ راست عوام کو ملنا چاہیے، آئندہ بجٹ میں عوامی ریلیف اور ترقیاتی منصوبوں پر توجہ دی جائے۔