فلسطینیوں پر تشدد کرنیوالے اسرائیلی آباد کاروں پر سخت اقدامات نافذ کئے جائیں گے، فرانس

فرانسیسی وزارت خارجہ کی ترجمان این کلیئر لوگاندے نے انکشاف کیا کہ ان کا ملک مغربی کنارے میں فلسطینی شہریوں کے خلاف تشدد کی کارروائیاں کرنے والے اسرائیلی آباد کاروں کے خلاف سخت اقدامات مسلط کرنا چاہتا ہے۔ ان اقدامات میں انہیں فرانس کا سفر کرنے سے روکنا اور ان کے مالیاتی اثاثے منجمد کرنا شامل ہیں۔

غیر ملکی خبر رساں ایجنسی کے مطابق لوگاندے نے کہا کہ فرانس مغربی کنارے میں فلسطینیوں کے خلاف آباد کاروں کے گروپوں کی طرف سے تشدد کی کارروائیوں کی مکمل مذمت کا اعادہ کرتا ہے۔ ہم نے اسرائیل سے مطالبہ کیا کہ وہ اپنی ذمہ داریاں سنبھالے اور تشدد کی ان کارروائیوں کو روکنے اور ان کے مرتکب افراد کے خلاف مقدمہ چلانے کے لیے عملی اقدامات کرے۔

انہوں نے مزید کہا کہ فرانس قومی سطح پر ایسے اقدامات کرنے کا ارادہ رکھتا ہے جس میں ان لوگوں کو فرانس کا سفر کرنے سے روکنا اور ان کے مالی اثاثوں کو منجمد کرنا شامل ہے۔ ہم یورپی سطح پر بھی اسی طرح کے اقدامات کو اپنانے پر زور دینے کے لیے کام کریں گے۔ یہ وہ موضوع ہوگا جس پر وزیر خارجہ کیتھرین کولونا یورپی یونین کے ممالک کے وزرائے خارجہ کی کونسل کے اجلاس کے دوران خطاب کریں گی۔

یاد رہے جرمنی نے پہلے ہی یورپی یونین سے مطالبہ کیا تھا کہ وہ ایسی پابندیاں عائد کرنے پر غور کرے۔ امریکہ نے منگل کو اعلان کیا کہ وہ مغربی کنارے میں فلسطینیوں کے خلاف تشدد کی لہر میں ملوث اسرائیلی آباد کاروں کو ویزا نہیں دے گا۔