چین کا امریکہ سے فلسطین پر اسرائیلی حملے رکوانے کا مطالبہ

غیر ملکی خبر رساں ادارے کے مطابق چین کی وزارت خارجہ کے ترجمان ژاؤ لیجیان نے پریس کانفرنس میں کہا  ہے کہ اسرائیل اور فلسطین کے مابین اس وقت 2014 کے بعد سے اب تک کا سب سے بڑا تنازع پیدا ہوا ہے جس کے حل کے لیے امریکہ کو اپنی ذمہ داریاں نبھانی چاہیئے۔

چینی وزارت خارجہ کے ترجمان  نے کہا کہ اسرائیل کو تحمل سے کام لیتے ہوئے مسلمانوں کے خلاف تشدد، دھمکیوں اور اشتعال انگیزی کا سلسلہ بند کرنا چاہیئے۔انہوں نے  کہا کہ فلسطین میں متاثرین کو امداد کی اشد ضرورت ہے اور انسانی ہمدردی کے تحت تمام ممالک مل کر فلسطینی عوام کے دکھوں کا مداوا کریں۔

واضح رہے کہ 10مئی  سے  جاری غزہ پر اسرائیل کے مسلسل بمباری کے نتیجے میں 212 سے زائد فلسطینی شہید اور سینکڑوں زخمی ہوچکے ہیں۔ فلسطینی وزیر صحت  کے مطابق اسرائیلی فوج کے فلسطینی علاقوں پر حملوں میں سات ہزار سے زیادہ افراد زخمی ہوچکے ہیں،   فلسطینی وزیرصحت   کاکہنا ہے کہ غزہ کی پٹی میں اسرائیل کے فضائی حملوں میں شہید ہونے والے افراد میں ایک تہائی بچّے ہیں۔فلسطین میں تقریبا دس ہزار افراد بے گھر ہوئے ہیں ۔