حکومت نے کاروباری افراد کیلئے نیشنل کریڈٹ گارنٹی کمپنی  قائم کر دی

حکومت نے چھوٹے اور درمیانے درجے کے کاروباری اداروں کی  قرضوں تک رسائی کو فروغ دینے کے لئے نیشنل کریڈٹ گارنٹی کمپنی  قائم کی ہے۔

 نگران وزیر خزانہ شمشاد اختر نے آج(جمعہ) کمپنی کے قیام کی تقریب سے خطاب کرتے ہوئے اس اعتماد کا اظہار کیا کہ نیشنل کریڈٹ گارنٹی کمپنی قرض تک بلا تفریق رسائی کے ذریعے چھوٹے اور درمیانے درجے کے کاروبار کی حالت کو بدل دے گی۔

 انہوں نے کہا کہ یہ کمپنی پاکستان کے ڈیڑھ کروڑ چھوٹے اور درمیانے کاروبار سے متعلق منصوبے تیار کرے گی اور مارکیٹ کا حجم تین ہزار ارب ستر کروڑ روپے سے زائد تک بڑھا دےگی۔

انہوں نے کہا کہ نیشنل کریڈ ٹ گارنٹی کمپنی ایک ایسا نظام تیار کرے گی جس سے چھوٹے اور درمیانے درجے کے کاروبار سے وابستہ افراد کو مارکیٹ کے چیلنجز سے نمٹنے میں مدد ملے گی۔

 انہوں نے کہا کہ نیشنل کریڈٹ گارنٹی کمپنی مالیاتی اداروں کے ساتھ مل کر کام کرے گی اور مارکیٹ میں کریڈٹ کی دستیابی یقینی بنائے گی۔

وزیر خزانہ نے کہا کہ چھوٹے اور درمیانے کاروبار کا مجموعی ملکی پیداوار میں تقریباً چالیس فیصد حصہ ہے اور یہ تقریباً اسی فیصد غیر زرعی افرادی قوت کے لئے روزگار کا ذریعہ ہونے کے ساتھ کم آمدن کے حامل طبقے کےلئے مواقع فراہم کررہے ہیں۔

 تاہم انہوں نے کہا کہ نیشنل کریڈٹ گارنٹی کمپنی کا قیام چھوٹے اور درمیانے کاروباری شعبے کی مضبوطی کےلئے ایک دوررس ادارہ جاتی اصلاح کا اقدام ہے ۔ 

 انہوں نے کہا کہ چھوٹے اور درمیانے درجے کے کاروبار میں ناکافی سرمایہ کاری ملک کی پائیدار شرح نمو اور ترقی کی راہ میں رکاوٹ بنی۔