پاکستان کی ترقی کے کیلئے خواتین کو کردار ادا کر نا ہو گا ،صدر مملکت

صدر مملکت ڈاکٹر عارف علوی نے کہا ہے کہ ملک کی ترقی اور خوشحالی کو یقینی بنانے کیلئے زندگی کے ہر شعبے میں خواتین کو بااختیار بنانا ضروری ہے۔ ایوان صدر میں لاہور چیمبر آف کامرس اینڈ انڈسٹری ( ایل سی سی آئی )کے زیر اہتمام خواتین کاروباری شخصیات کی خدمات کے اعتراف کے لئے منعقدہ پہلی ایل سی سی آئی وومن انٹرپرینیورز ریکگنیشن تقریب 2024 سے خطاب کرتے ہوئے صدر نے خواتین کو بااختیار بنانے میں لاہور چیمبر کے کردار کو سراہا۔

انہوں نے کہا کہ ایل سی سی آئی پہلا چیمبر آف کامرس اینڈ انڈسٹری ہے جس نے کاروباری خواتین کے لیے ایوارڈز کا اہتمام کیا اور دیگر چیمبرز کو بھی خواتین کو بااختیار بنانے کے لیے ایسا ہی کردار ادا کرنا چاہیے ۔ انہوں نے کہا کہ ایل سی سی آئی کو چاہیے کہ وہ خواتین کی تربیت اس طرح کرے کہ وہ دنیا میں کہیں بھی کام کرنے کے قابل ہو سکیں۔ صدر مملکت نے کہا کہ ایل سی سی آئی نے خاتون اول بیگم ثمینہ علوی کی طرف سے شروع کردہ چھاتی کے کینسر اور خصوصی افراد کے حقوق بارے میں آگاہی مہم سمیت مختلف پروگراموں میں تعاون پر مبنی کردار ادا کیا ہے۔

انہوں نے کہا کہ ملک میں خواتین اکثر شادی کے بعد اپنا پیشہ چھوڑ دیتی ہیں جس کا مطلب ہے کہ وہ ملکی وسائل کو ضائع کر رہی ہیں۔ صدرمملکت  نے ایسی خواتین کو تلقین کی  کہ وہ اپنا پیشہ نہ چھوڑیں اور ملک کی ترقی کے لیے مک کر کام کریں۔

اسرائیل کی جانب سے غزہ میں ڈھائے جانے والے مظالم کا ذکر کرتے ہوئے صدرمملکت ڈاکٹر عارف علوی  نے کہا کہ اس بحران کے دوران خواتین سب سے زیادہ متاثر ہوئیں۔ 

صدر مملکت نے نمایاں کارکردگی کا مظاہرہ کرنے پر خواتین کاروباری شخصیات کو ان کی خدمات پر ایوارڈز سے نوازا۔ اس موقع پر لاہور چیمبر آف کامرس اینڈ انڈسٹری کے صدر کاشف انور نے کہا کہ جب تک حکومت خواتین کو مناسب ماحول فراہم نہیں کرتی وہ تجارت اور سرمایہ کاری کے شعبے میں بھرپور کردار ادا نہیں کر سکتیں۔