مسئلہ کشمیر کے حل تک جنوبی ایشیا میں امن قائم نہیں ہو سکتا ،وزیر خارجہ

نگران وزیر خارجہ جلیل عباس جیلانی نے کہا ہے کہ اقوام متحدہ کی سلامتی کونسل کی قراردادوں اور کشمیری عوام کی خواہشات کے مطابق جموں و کشمیر کے تنازعے کے منصفانہ حل تک جنوبی ایشیاء میں امن ایک خواب ہی رہے گا۔

نگران وزیر خارجہ جلیل عباس جیلانی نے  بدھ کے روز برسلز میں پاکستانی سفارت خانے میں اگلے ماہ کی پانچ تاریخ کو یوم یکجہتی کشمیر کے سلسلے میں ایک تصویری نمائش کا افتتاح کرتے ہوئے کہا کہ امن کو قائم کرنا ایک بہت بڑا چیلنج بن چکا ہے ۔ 

اس نمائش میں بھارت کے غیر قانونی زیر قبضہ جموں و کشمیر میں مظلوم عوام کی حالت زار کو اجاگر کیا گیا ہے۔

انہوں نے کہا کہ عالمی برادری کو مقبوضہ جموں و کشمیر میں انسانی حقوق کی جاری خلاف ورزیاں رکوانے ، 5 اگست 2019 کے غیر قانونی اور یکطرفہ اقدامات واپس لینے اور اقوام متحدہ کی سلامتی کونسل کی قراردادوں پر عمل درآمد کیلئے بھارت پر دبائو ڈالنا چاہئے۔انہوں نے کہا کہ پاکستان ناقابل تنسیخ حق خودارادیت کی جدوجہد میں کشمیروں کے ساتھ مکمل اظہار یکجہتی کرتا رہے گا۔

وزیر خارجہ نے اپنے خطاب میں کہا کہ جموں و کشمیر کے بہادر جوانوں اور بیٹیوں نے جبر و استداد کی تمام بھارتی کوششوں کی جوانمردی سے مزاحمت کی ہے۔انہوں نے کہا کہ بھارت کشمیری عوام کی خواہشات دبانے میں ناکام ہو گیا ہے اور ان کی قربانیاں تاریخ میں یاد رکھی جائیں گی۔