جنرل ہسپتال لاہور میں جدید ایم آرآئی اور سی ٹی سکین مشینوں کا افتتاح

نگران وزیرصحت پنجاب پروفیسرڈاکٹرجاویداکرم نے جنرل ہسپتال میں 72کروڑروپے کی لاگت سے خریدی گئی جدید ایم آرآئی اور سی ٹی سکین مشینوں کا افتتاح کردیا۔

نگران صوبائی وزیرصحت نے پریس کانفرنس سے خطاب کرتے ہوئے کہا کہ وزیراعلی پنجاب سید محسن نقوی کے ویژن کے مطابق جنرل ہسپتال لاہورمیں مریضوں کوجدید ایم آرآئی اور سی ٹی سکین مشینوں کا تحفہ دے دیاگیاہے۔ایم آرآئی اور سی ٹی سکین مشینوں میں زیادہ سے زیادہ سکین اور بہترین رزلٹ کی صلاحیت موجودہے۔ پنجاب کی نگران حکومت سوسے زائد سرکاری ہسپتالوں میں 96ارب روپے کی لاگت سے ری ویمپنگ کر رہی ہے۔پنجاب کی نگران حکومت نے عوام کی نیک نیتی سے خدمت کی ہے۔

پروفیسرڈاکٹر جاوید اکرم نے کہا کہ جنرل ہسپتال میں جدید ایم آرآئی اور سی ٹی سکین مشینوں کی پروسیسینگ میں خصوصی کاوش پر پرنسپل سردار الفریدظفراور ان کی ٹیم کومبارکباداور شاباش دی۔ پنجاب کی نگران حکومت اللہ کی عدالت میں سرخروہے۔ہر منصوبے کو دل و جان سے مکمل کروایا ہے۔پنجاب کےعوام کےلئے آسانیاں پیدا کرنے کی پوری کوشش کی۔

صحافیوں سے بات چیت کرتے ہوئے پرنسپل پروفیسر الفرید ظفر نے بتایا کہ لاہور جنرل ہسپتال میں صرف پنجاب ہی نہیں بلکہ ملک کے دیگر حصوں سے بھی روزانہ اوسطا 8ہزار سے زائد مریض علاج ومعالجے کے لئے ایمرجنسی و آوٹ ڈور میں آتے ہیں جبکہ ہسپتال کی اپ گریڈیشن کے بعد مریضوں کو مزید سہولیات آسانی کے ساتھ دستیاب ہوں گی۔