الیکشن کمیشن نے عطا تارڑ اور مصباح الرحمان کو طلب کر لیا

لاہور: الیکشن کمیشن آف پاکستان (ای سی پی) نے اتوار کو پاکستان مسلم لیگ (ن) کے امیدوار عطا تارڑ اور پاکستان پیپلز پارٹی (پی پی پی) کے امیدوار میاں مصباح الرحمان کو ضابطہ اخلاق کی مبینہ خلاف ورزی پر نوٹس جاری کردیا۔ 

عطا تارڑ این اے 127 سے الیکشن لڑ رہے ہیں جبکہ پی پی 160 سے میاں مصباح الرحمان پیپلز پارٹی کے امیدوار ہیں ، الیکشن کمیشن نے دونوں رہنماؤں کو ذاتی حیثیت میں پیش ہونے کی ہدایت کی۔

یاد رہے کہ ان  دونوں فریقین نے عام انتخابات سے قبل ایک دوسرے پر ووٹ خریدنے کا الزام لگایا ، ذرائع کے مطابق  ڈسٹرکٹ مانیٹرنگ آفیسر نے دونوں امیدواروں کو دستاویزی ثبوت فراہم کرتے ہوئے 5 فروری کو ہونے والی میٹنگ کے لیے طلب کیا۔

مسلم لیگ ن کے رہنما عطا تارڑ نے ایک ویڈیو پیغام میں کہا کہ انہوں نے پیپلز پارٹی کے انتخابی دفتر سے مقدس کتابیں برآمد کیں اور الزام لگایا کہ ووٹرز سے کہا جا رہا ہے کہ وہ پیپلز پارٹی کو ووٹ دینے کا حلف لیں۔

پی پی پی نے اس سے قبل ن لیگ کے عطا تارڑ اور دیگر کے خلاف این اے 127 لاہور میں اس کے انتخابی دفتر پر حملہ کرنے کا الزام لگاتے ہوئے ایف آئی آر درج کرنے کا مطالبہ کیا تھا۔

پی پی پی کی رہنما شہلا رضا نے ایک پریس بریفنگ میں دعویٰ کیا کہ تارڑ نے حملے کی منصوبہ بندی کی اور پی پی پی کے تین کارکنوں کو اغواء کیا ۔ 

حلقہ این اے 127 میں پیپلز پارٹی کے چیئرمین بلاول بھٹو زرداری اور مسلم لیگ ن کے عطاء تارڑ مدمقابل ہیں۔

اس سے قبل یہ رپورٹس منظر عام پر آئی تھیں کہ پولیس نے لاہور کے حلقہ این اے 127 میں مسلم لیگ (ن) اور پیپلز پارٹی کے درمیان کشیدگی کے حوالے سے رپورٹ ای سی پی کو پیش نہیں کی۔ ای سی پی نے صورتحال سے متعلق خدشات کے پیش نظر مداخلت کی اور واقعہ کی تفصیلات موصول ہونے میں تاخیر پر برہمی کا اظہار کرتے ہوئے پنجاب حکومت اور پولیس سے رپورٹس طلب کیں۔