یوم یکجہتی کشمیر آج منایا جارہا ہے

یوم یکجہتی کشمیر آج منایا جارہا ہے۔ جس کا مقصد اقوام متحدہ کی قراردادوں کے تحت کشمیریوں کے ناقابل تنسیخ حق خودارادیت کے حصول کی منصفانہ جدوجہد کے لئے پاکستانی قوم کی مکمل حمایت کا اظہار کرنا ہے۔

امور کشمیر کی وزارت نے ایک بیان میں کہا ہے کہ آج اندرون و بیرون ملک بھرپور انداز میں یوم یکجہتی کشمیر منانے کیلئے تمام انتظامات کیے گئے ہیں۔ بیان میں کہاگیا کہ آج ملک بھر اورآزاد جموں وکشمیرمیں یکجہتی واکس کا اہتمام کیاجائے گا۔

اسلام آباد میں شاہراہ دستور پرکشمیری عوام سے اظہار یکجہتی کیلئے ایک ریلی نکالی جائے گی، شہدا ئے کشمیر کو خراج عقیدت پیش کرنے کیلئے صبح ساڑھے نو بجے ایک منٹ کی خاموشی اختیار کی جائے گی۔

کشمیریوں کی حالت زار کو اجاگر کرنے کیلئے اہم شاہراہوں، ہوائی اڈوں اور ریلوے سٹیشنوں پر پوسٹر اور بل بورڈز آویزاں کیے گئے ہیں۔

ملک بھر کے تعلیمی اداروں میں اس دن کی مناسبت سے مباحثے ، تقریروں اور مضمون نگاری کے مقابلوں کااہتمام کیاجارہاہے، ریڈیوپاکستان بھارت کے غیرقانونی زیر قبضہ جموں وکشمیر کے مظلوم عوام سے اظہار یکجہتی کیلئے خصوصی پروگرام نشر کر رہا ہے۔