ڈاکٹر گوہر اعجاز کا وزارت داخلہ کنٹرول روم، سیف سٹی اسلام آباد اور پولنگ اسٹیشن کا دورہ

نگران وفاقی وزیر داخلہ ڈاکٹر گوہر اعجاز نے وزارت داخلہ کے کنٹرول روم، سیف سٹی اسلام آباد اور پولنگ اسٹیشن کا دورہ کیا۔سیکریٹری داخلہ، چیف کمشنر اسلام آباد اور آئی جی اسلام آباد وزیر داخلہ کے ہمراہ تھے۔کنٹرول روم آمد پر کورآڈینیٹر نیشنل ایکشن پلان نے وزیر داخلہ کو ملک میں عام انتخابات کے دوران سکیوریٹی صورتحال کے حوالے سے بریفنگ دی۔

وزیر داخلہ نے کہا کہ ملک بھر میں پولنگ کا عمل خوش اسلوبی سے جاری ہے، فی الحال کوئی بڑا ناخوشگوار واقع پیش نہیں آیا، ٹانک میں کوئیک ریسپانس فورس پر حملہ میں ایک جوان کی شہادت انتہائی افسوس ناک ہے۔ انہوں نےکہا کہ پولنگ کے عمل کی کڑی نگرانی جاری ہے، کسی کو قانون ہاتھ میں لینے کی اجازت نہیں دی جائے گی۔

انہوں نے امید ظاہر کی کہ ملک بھر میں انتخابات کا عمل پر امن طریقے سے مکمل ہو گا۔بعد ازاں وزیر داخلہ نے ڈاکٹر گڈ لک جوناتھن سربراہ کامن ویلتھ کے آبزرور مشن کے ہمراہ سیف سٹی اسلام آباد کا دورہ بھی کیا جہاں آئی جی اسلام آباد نے شہر میں امن وامان اور پولنگ کے حوالے سے تفصیلی بریفنگ دی۔آئی جی اسلام آباد نے بتایا کہ اسلام آباد میں انتخابات کا عمل پر امن طریقے سے جاری ہے، فی الحال کو ئی شکایت موصول نہیں ہوئی۔