مسلم لیگ ن کا پیپلزپارٹی سے مشترکہ حکومت بنانے پر اتفاق

سابق صدر آصف علی زرداری اور پاکستان پیپلز پارٹی کے چئیرمین بلاول بھٹو ہنگامی طور پر لاہور پہنچ گئے ہیں جہاں ان کی محسن نقوی کی رہائش گاہ پر مسلم لیگ (ن) کی قیادت سے ملاقات ہوئی۔

مسلم لیگ (ن) کے قائد نواز شریف نے اپنے حالیہ بیان میں کہا تھا کہ انہوں نے حکومت بنانے کیلئے شہباز شریف کو آصف زرداری سمیت دیگر اتحادیوں سے ملاقاتوں کو ٹاسک سونپا ہے۔

شہباز شریف نے آصف علی زرداری سے ٹیلی فونک رابطہ کیا تھا اور ان سے ملاقات کی خواہش کا اظہار کیا تھا ، جس کے بعد شہباز شریف اور اسحاق ڈار نے آصف علی زرداری سے ملاقات کی اور نواز شریف کا پیغام پہنچایا، شہباز شریف نے آصف زرداری کو مشترکہ حکومت سازی کی دعوت دی۔

ذرائع کے مطابق آصف زرداری اور بلاول لاہور میں اپنی پارٹی کے رہنماؤں سے بھی ملاقات کریں گے، جبکہ این اے 127 میں انتخابی نتائج چیلنج کرنے پر بھی مشاورت ہوگی۔

میڈیا ذرائع کے مطابق آصف زرداری اور شہبازشریف کے درمیان مل کر حکومت سازی پر اتفاق رائے ہوچکا ہے اور آئندہ ملاقات میں معاملات کو باہمی مشاورت کے ساتھ حتمی شکل دے  دی جائے گی۔