پولیس نے پی ایس ایل 9 کے میچز کے لیے ٹریفک پلان تیار کر لیا

لاہور: لاہور پولیس نے پاکستان سپر لیگ (پی ایس ایل 9) کے لاہور میں ہونے والے میچز کے دوران ٹریفک کی روانی برقرار رکھنے کے لیے پلان جاری کرتے ہوئے اس حوالے سے شائقین کرکٹ کو آگاہ کر دیا ہے۔

پی ایس ایل 9 کرکٹ ٹورنامنٹ میں صرف دو دن رہ گئے ہیں، شائقین کرکٹ میچ اور اپنے پسندیدہ کھلاڑیوں کی اننگز دیکھنے کے لیے بے تاب ہیں۔

اس سلسلے میں لاہور ٹریفک پولیس نے عوام کی سہولت اور شائقین کرکٹ کی آگاہی کے لیے ٹریفک پلان بھی جاری کر دیا ہے۔

چیف ٹریفک آفیسر (سی ٹی او) لاہور عمارہ اطہر نے بتایا کہ 4 سپرنٹنڈنٹس آف پولیس (ایس پیز)، 12 ڈسٹرکٹ سپرنٹنڈنٹ آف پولیس (ڈی ایس پیز) اور 90 انسپکٹرز ڈیوٹی سرانجام دیں گے۔

عمارہ اطہر نے بتایا کہ قذافی اسٹیڈیم میں 900 سے زائد وارڈنز تعینات کیے جائیں گے۔ جبکہ غیر قانونی پارکنگ کے خاتمے کے لیے ٹیموں کے روٹس اور متبادل راستے، 20 فورک لفٹ، پانچ بریک ڈاؤن بھی تعینات کیے جائیں گے۔

شائقین کرکٹ کی سہولت اور اسٹیڈیم تک آسان رسائی کے لیے تین پارکنگ اسٹینڈز مختص کیے جائیں گے۔ سٹی ٹریفک پولیس شائقین کرکٹ کا روایتی انداز میں استقبال کرے گی۔ مال روڈ، کینال روڈ، جیل روڈ، مین بلیوارڈ روڈ اور گلبرگ ٹریفک کے لیے کھلے رہیں گے۔

سی ٹی او لاہور عمارہ اطہر کا مزید کہنا تھا کہ میچ کے دوران زیادہ تر سڑکوں کو ٹریفک کے لیے بند نہیں کیا جائے گا جب کہ ٹیم کی نقل و حرکت کے دوران کچھ سڑکیں کچھ دیر کے لیے بند رہیں گی۔ شائقین کرکٹ کی سہولت اور اسٹیڈیم تک آسان رسائی کے لیے تین پارکنگ اسٹینڈز بھی مختص کیے گئے ہیں۔