مولانا فضل الرحمان سیاست میں چلے ہوئے کارتوس ہیں، فیصل کریم کنڈی

پیپلز پارٹی کے رہنما فیصل کریم کنڈی نے کہا ہے کہ مولانا فضل الرحمان سیاست میں چلے ہوئے کارتوس ہیں، مولانا وہ وقت بھول گئے جب بانی چیئرمین پی ٹی آئی انکی تضحیک کرتے تھے۔

پریس کانفرنس کرتے ہوئے پیپلز پارٹی کے ترجمان فیصل کریم کنڈی نے کہاکہ مولانا فضل الرحمان سیاست میں آ نہیں رہے بلکہ جا رہے ہیں۔ عدم اعتماد کے بعد سب سے زیادہ فائدہ فضل الرحمان کو ملا،انہیں وزارتیں اور گورنر کے پی کے کا عہدہ ملا،  فضل الرحمان کہہ دیتے اور عدم اعتماد میں ساتھ نہ دیتے بتائیں ہمیں کس کے کہنے پر پی ڈی ایم سے نکالا گیا؟ 

فیصل کریم کنڈی نے کہا کہ سارے مزے لوٹنے کے بعد اب یاد آیا کہ انتخابات میں دھاندلی ہوئی۔ مولانا زمین اور میدان گرم کرنے کی بات کرتے ہیں لیکن میدان تو اب ٹھنڈا ہو گیا ہے۔کل اسلام آباد میں بڑی تبدیلی دیکھنے کوملی، جے یو آئی اور پی ٹی آئی کا ملاپ ہواجوبڑی سیاسی تبدیلی ہے۔ جے یوآئی اور پی ٹی آئی کاسیاسی اتحاد اچھی بات ہے، المیہ یہ ہےپی پی یا ن لیگ ایسا کرتی تو ٹی وی پرماضی کےبیانات چلتے ہیں۔

پی پی رہنما نے کہا کہ فضل الرحمان اپنے حلقےسے ہارے ہیں اور بقول ان کے اُن کا مینیڈیٹ چوری کیا گیا ہے۔ کل مولانا نے جنرل فیض حمید اور باقی لوگوں کی بات کی لیکن عمران خان کیخلاف تحریک عدم اعتماد کے وقت فیض حمید پشاورمیں سرکاری عہدے پر تھے، ان کا کوئی تعلق نہیں تھا۔