کمشنر راولپنڈی کے معاملہ پر اعلیٰ تحقیقاتی کمیٹی بنی ہے، نگران وزیر اطلاعات

نگران وفاقی وزیر اطلاعات، نشریات و پارلیمانی امور مرتضیٰ سولنگی نے کہا ہے کہ کمشنر راولپنڈی کے معاملہ پر اعلیٰ تحقیقاتی کمیٹی بنی ہے، الیکشن کمیشن بھی اس معاملے پر کارروائی کر رہا ہے، میں سازشی نظریوں پر اعتبار نہیں رکھتا۔

پیر کو یہاں میڈیا سے گفتگو کرتے ہوئے وفاقی وزیر اطلاعات نے کہا کہ الیکشن کمیشن کی جانب سے کامیاب امیدواروں کی فہرست جاری ہونے کے بعد وزارت پارلیمانی امور قومی اسمبلی کا اجلاس طلب کرنے کی سمری نگران وزیراعظم کو بھجوائے گی اور صدر مملکت سے قومی اسمبلی کا اجلاس طلب کرنے کی درخواست کی جائے گی۔

انہوں نے کہا کہ نگران حکومت نے اپنی ذمہ داری پوری کی ہے، کمشنر راولپنڈی کے معاملہ پر اعلیٰ تحقیقاتی کمیٹی بنی ہے جبکہ الیکشن کمیشن بھی اس معاملہ پر کارروائی کر رہا ہے۔ ہمیں اپنے اداروں اور نظام پر اعتماد کرنا چاہئے۔ قانونی عمل چل رہا ہے تو انتظار کرنا چاہئے۔

 وفاقی وزیر اطلاعات نے کہا کہ آئین اور قانون کے تحت جیسے ہی الیکشن کمیشن کامیاب امیدواروں کی فہرست جاری کرے گا، وزارت پارلیمانی امور قومی اسمبلی کا اجلاس طلب کرنے کی سمری نگران وزیراعظم کو بھجوائے گی اور صدر مملکت سے قومی اسمبلی کا اجلاس طلب کرنے کی درخواست کی جائے گی۔