اے این ایف کی منشیات سمگلنگ کے خلاف کارروائیاں ،109 کلو گرام منشیات برآمد، 12 ملزمان گرفتار

راولپنڈی: اینٹی نارکوٹکس فورس نے منشیات سمگلنگ کے خلاف 11 کارروائیوں میں 109 کلو گرام منشیات برآمدکر کے12 ملزمان کو گرفتار کرلیا۔

اے این ایف ترجمان کے مطابق اسلام آباد ایئرپورٹ پر قطر جانے والے مسافر سے 1 کلوگرام آئس برآمدکی گئی، لاہور ایئرپورٹ سے دو مختلف پروازوں پر قطر جانے والے مسافروں سے 663 گرام اور 352 گرام آئس برآمدکی گئی۔

فیصل آباد سے دوحہ جانے والے مسافر سے 592 گرام ہیروئن،ایم ٹو موٹر وے لاہور کے قریب سے 84 کلو گرام افیون ،صوابی انٹرچینج کے قریب سے 15 کلو گرام ہیروئن اور اورنگی ٹاؤن کراچی میں ملزم سے 1.7 کلوگرام ہیروئن اور 130 گرام آئس برآمد کی گئی۔

ٹنڈو ٹھوڑو حیدرآباد میں ملزم سے 2 کلوگرام چرس برآمدکی گئی۔سکھر روڈ پر دو ملزمان سے 1 کلوگرام آئس اور 952 گرام افیون برآمدکی گئی۔ راولپنڈی میں چکلالہ سکیم تھری سے 1 کلو گرام چرس برآمدکرکے دو ملزمان گرفتارکئے گئے۔

جہلم میں دو ملزمان سے 1 کلو گرام چرس برآمدکی گئی ۔ترجمان نے بتایا کہ گرفتار ملزمان کے خلاف انسدادِمنشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔