وزارت خزانہ نے ماہانہ معاشی آؤٹ لک رپورٹ جاری کر دی

وزارت خزانہ نے ماہانہ معاشی  آؤٹ لک رپورٹ جاری کر دی، کرنٹ اکاؤنٹ خسارے میں 7 ماہ میں 71.2 فیصد کی کمی ہوئی ہے۔

رپورٹ  میں پی آئی اے سمیت خسارے کا شکار اداروں کی نجکاری پر زور دیا گیا ہے۔رپورٹ کے مطابق رواں مالی سال کے 7 ماہ میں برآمدات میں 9.3 فیصد کا اضافہ ریکارڈ کیا گیا ہے۔ زرمبادلہ کے ذخائر 9 ارب 25 کروڑ ڈالر سے بڑھ کر 13 ارب ڈالر سے تجاوز کر گئے ہیں۔

وزارت خزانہ کی جانب سے ماہانہ اکنامک آؤٹ لک رپورٹ میں آئی ایم ایف سے جلد نئے قرض پروگرام کے لئے معاہدہ ناگزیر قرار دیا گیا ہے۔ غیرمقبول فیصلوں سے معیشت بحالی کی راہ پر گامزن ہے۔ نئی حکومت ایف بی آر کی تنظیم نو کیلئے ضروری اصلاحات کرے۔

رپورٹ میں کہا گیا کہ حکومتی ملکیتی اداروں میں گورننس اور مالی کارکردگی بہتر بنانا ہوگی، مشکل اصلاحات کیلئے آئی ایم ایف سے میڈیم ٹرم سہولت لینا ہوگی۔نگران حکومت نے آئی ایم ایف سے معاہدے کے تحت اہداف پورے کی۔ رواں ماہ مہنگائی 25.5 فیصد تک اور آئندہ ماہ 24.5 فیصد تک رہے گی۔

وزارت خزانہ کے مطابق جولائی تا دسمبر 1500 ارب روپے پرائمری سرپلس رہا، آئی ایم ایف کے 0.5 فیصد ہدف کے مقابلے پرائمری سرپلس 1.5 فیصد رہا، پہلے 7 ماہ میں برآمدات 9.3 فیصد اضافے سے 18 ارب ڈالر رہیں، جولائی تا دسمبر ایف بی آر کے ریونیو میں 29.8 فیصد اضافہ ہوا اور 5 ہزار 159 ارب وصولی کی گئی۔

رپورٹ کے مطابق نان ٹیکس ریونیو میں 116.5 فیصد اضافہ ہوا، جولائی تا دسمبر ایک ہزار 979  ارب روپے وصول کیے گئے، جبکہ مالی خسارہ 43 فیصد اضافے سے 2 ہزار 407 ارب روپے سے تجاوز کر گیا۔