وزیر اعظم شہباز شریف کے ساتھ  مل کر مشترکہ مفادات کو آگے بڑھائیں گے، امریکا

امریکی محکمہ خارجہ کےترجمان میتھو ملر نےکہا ہےکہ امریکا پاکستان کی نئی حکومت کے ساتھ کام کرنے کے لئے تیار ہے، وزیر اعظم شہباز شریف کے ساتھ  مل کر مشترکہ مفادات کو آگے بڑھائیں گے۔

امریکی محکمہ خارجہ کےترجمان میتھو ملر کا پریس کانفرنس کےدوران کہنا تھا کہ مضبوط اور خوشحال پاکستان دنیا اور امریکا کے مفاد میں ہیں اور دونوں ممالک کے تعلقات اعتماد پر مبنی ہیں۔ پاکستان کے ساتھ تعلقات کو قدر کی نگاہ سے دیکھتے ہیں۔

امریکی محکمہ خارجہ نے کہا ہے کہ مریم نواز کا وزیراعلیٰ منتخب ہونا پاکستانی سیاست میں سنگ میل کی حیثیت رکھتا ہے، خواتین کو سیاسی زندگی میں مکمل شامل کرنے کے منتظر ہیں۔ پاکستان کے ساتھ دیرینہ شراکت داری ہے، امریکا پاکستان کے ساتھ اتحاد کو قدر کی نگاہ سے دیکھتا ہے۔

میتھو ملر کا مزید کہنا تھا کہ خوشحال اور جمہوری پاکستان کو امریکا اور پاکستان کے مفادات کے لیے اہم سمجھتے ہیں، وزیراعظم شہباز شریف اور ان کی حکومت کے ساتھ مشترکہ مفادات کو آگے بڑھانے پر توجہ مرکوز رہے گی۔

ترجمان محکمہ خارجہ کا کہنا تھا کہ خواتین کو ملک کی سیاسی دھارے میں شامل کرنے کے لیے پاکستان کے ساتھ تعاون کرنے کے منتظر ہیں، پاک امریکا ویمن کونسل، سول سوسائٹی، فیصلہ سازی کے دیگر اداروں سے تعاون جاری ہے۔