وزیر اعظم شہباز شریف کا کشمیر متاثرین کیلئے امدادی پیکج کا اعلان

اسلام آباد : وزیراعظم محمد شہباز شریف نے کہا ہے کہ حکومت معیشت میں شعبہ جاتی اصلاحات کے ذریعے ملک کو اقتصادی بحران سے نکالنے کے لئے پرعزم ہے۔

مظفر آباد میں شدید بارشوں اور برف باری کے متاثرین میں چیک تقسیم کرنے کی تقریب سے خطاب کرتے ہوئے انہوں نے کہا کہ حکومت قدرتی اور زرعی وسائل کی بڑی گنجائش سے فائدہ اٹھانے، سمگلنگ کی روک تھام، بجلی چوری اور ریاستی اداروں کے نقصانات روکنے کیلئے پوری طرح پرعزم ہے۔

وزیراعظم شہباز شریف نے کہاکہ رواں مالی سال کے لئے ٹیکس جمع کرنے کا ہدف 12 کھرب ر وپے ہے جو ٹیکس بچانے کے باعث اپنی حقیقی گنجائش سے کہیں کم ہے۔

انہوں نے کہا ٹیکس بچانا ایک بڑا مسئلہ ہے جسے حل کیا جائے گا تاکہ ملکی وسائل میں اضافہ کیاجاسکے ، وزیراعظم نے کہا وقت آگیا ہے کہ ملک کو درپیش اہم مسائل حل کرنے کیلئے سخت اور اہم فیصلے کیے جائیں۔

ریاستی اداروں کے خساروں کا ذکر کرتے ہوئے وزیراعظم نے بتایا کہ ریاستی اداروں کو سینکڑوں ارب روپے خسارے کا سامنا ہے اور صرف پاکستان انٹرنیشنل ائیرلائنز کا خسارہ تقریباً آٹھ سو پچیس ارب روپے ہے اسی طرح سالانہ 500 ارب روپے کی بجلی چوری ہوتی ہے۔

آزادجموں وکشمیر میں حالیہ بارشوں ، برف باری اورمٹی کے تودے گرنے کی وجہ سے ہونے والی جانی ومالی نقصانات سے متعلق بات کرتے ہوئے وزیراعظم نے ان واقعات میں آٹھ قیمتی جانوں کے ضیاع پردکھ اور افسوس ظاہر کیا اورزخمیوں کی جلد صحت یابی کی دعا کی۔

انہوں نے کہاکہ پاکستانی حکومت نے ضرورت کی گھڑی میں اپنے کشمیری بہن بھائیوں کا ہمیشہ ساتھ دیا ۔

وزیراعظم پاکستان نے کہاکہ جموں وکشمیر پاکستان کی شہ رگ ہے اور مشکل کی اس گھڑی م یں کشمیری عوام کو کبھی اکیلا نہیں چھوڑیں گے۔

وزیراعظم پاکستان نے کہاکہ حالیہ واقعات میں جاں بحق ہونے والوں کے خاندانوں کو فی کس بیس لاکھ روپے اورزخمیوں کو پانچ لاکھ روپے دئیے جائیںگے اسی طرح مکمل تباہ ہونے والے گھروں کے افراد کو فی کس سات لاکھ روپے اور جزوی نقصان والے گھروں کے مالکان کو ساڑھے تین لاکھ روپے دئیے جائیں گے۔