سرکاری املاک کو نقصان پہنچانے والوں کے خلاف قانون حرکت میں آئے گا، مریم نواز

 وزیرِ اعلیٰ پنجاب مریم نواز نے کہا ہے کہ سیاست کی آڑ میں ملک میں عدم استحکام لائیں گے تو کوئی رعایت نہیں ہو گی، ہم کریک ڈاؤں کر رہے ہیں کسی سے کوئی رعایت نہیں ہو گی۔ گورننس کے شدید مسائل ہے اس کو حل کرنے میں وقت لگے گا۔

لاہور میں صحافیوں سے گفتگو کرتے ہوئے مریم نواز نے کہا کہ جہوری حق دیں گے لیکن سیاست دانوں کو جمہوریت کی آڑ میں عدم استحکام پھیلانے کی اجازت نہیں دیں گے۔ہم کریک ڈاؤن کر رہے ہیں، کسی سے کوئی رعایت نہیں ہوگی۔

انہوں نے کہا کہ ایک خاتون کی ویڈیو دیکھی جس نے پولیس کی وین پر حملہ کیا اور لوگوں کو چھڑوا کر لے گئی ،یہ کونسے سے ملک میں ہوتا ہے کہ حملہ کرکے لوگوں کو چھڑوالیں۔ اگر آپ یہ سمجھتے ہیں کہ اپنا جمہوری حق ملک میں انتشار پھیلانے کے لئے استعمال کریں گے تو ایسا بالکل نہیں ہونے دوں گی۔ انہوں نے کہا کہ یہ معاملہ سیاسی انتقام میں نہیں آتا اگر آپ سڑکوں پر نکلیں گے تو زمہ دار شہری بننا پڑے گا ،اگر عوام یا سرکاری املاک کو نقصان پہنچانے کا اندیشہ ہو گا تو قانون حرکت میں آئے گا۔

انہوں نے کہا کہ چیف سیکرٹری کی سربراہی میں ٹیم متحرک ہے، چیف سیکرٹری روزانہ کی بنیاد پر تمام ضلعوں کی رپورٹس بھجوائیں، جس کی ضرورت پڑے گی ٹرانسفر پوسٹنگ کریں گے، ہم جو مناسب اخراجات ہیں وہ کریں گے ، پنجاب کی عوام کا جو بنیادی حق ہے وہ انہیں دیں گے۔

رمضان میں عوام کو ریلیف ملے گا، رمضان میں پوری دنیا میں قیمتیں نیچے جاتی ہیں ، ہمارےہاں بڑھ جاتی ہیں ، قیمتوں کو کنٹرول کرنے کا ہمارے پاس کوئی نظام موجود نہیں ہے ، مہنگائی کو قابو کرنے کیلئے اقدامات کر رہے ہیں۔