کلیئرنس آپریشن میں لیفٹیننٹ کرنل اور کیپٹن سمیت7 سکیورٹی اہلکار شہید

شمالی وزیرستان میں سکیورٹی فورسز کی ایک چوکی پر دہشت گردوں کے حملے اور کلیئرنس آپریشن میں ایک لیفٹیننٹ کرنل اور کیپٹن سمیت سات سکیورٹی اہلکار شہید ہو گئے۔

فوج کے شعبہ تعلقات عامہ کے مطابق 6 دہشت گردوں کے ایک گروپ نے میر علی کے علاقے میں سکیورٹی فورسز کی چیک پوسٹ پر حملہ کیا۔ فورسز نے ابتدائی حملے کو ناکام بنا دیا۔

دہشت گردوں نے بارودی مواد سے لدی گاڑی چوکی سے ٹکرا دی جس کے بعد متعدد خودکش بم دھماکے ہوئے جس کے نتیجے میں عمارت کا ایک حصہ منہدم ہو گیا اور پانچ سپاہی شہید ہو گئے۔ شہید ہونے والوں میں حوالدار صابر، نائیک خورشید، سپاہی ناصر، سپاہی راجہ اور سجاد شامل ہیں۔

تاہم فائرنگ کے شدید تبادلے کے دوران لیفٹیننٹ کرنل سید کاشف علی اور کیپٹن محمد احمد بدر نے محاذ پر اپنے دستوں کی قیادت کرتے ہوئے جاں بازی سے مقابلہ کیا اور دلیری سے لڑتے ہوئے شہید ہو گئے۔

لیفٹیننٹ کرنل کاشف کی زیر قیادت فوجی دستے نے کلیئرنس کارروائی کے دوران موثر حکمت عملی کے ذریعے تمام چھ دہشت گردوں کو ہلاک کر دیا۔

یاد رہے کہ علاقے میں کسی اور دہشت گرد کی ممکنہ موجودگی کے پیش نظر علاقے کو خالی کرانے کی کارروائی جاری ہے۔