سینیٹ انتخابات کاغذات کی جانچ پڑتال کل تک جاری رہے گی

سینیٹ کی 48 خالی نشستوں پر انتخابات کے لئے جمع کرائے گئے کاغذات نامزدگی کی جانچ پڑتال کل (منگل) تک جاری رہے گی۔

امیدواروں کی نظرثانی شدہ فہرست رواں ماہ کی چھبیس تاریخ کو جاری کی جائے گی جبکہ امیدوار اس ماہ کی 27 تاریخ تک اپنے کاغذات واپس لے سکتے ہیں۔پولنگ آئندہ ماہ کی دو تاریخ کو ہوگی۔

وفاقی دارلحکومت میں ارکان قومی اسمبلی سینیٹ کی ایک جنرل نشست اور علما سمیت ٹیکنوکریٹ کی ایک نشست پر سینیٹ کے ارکان کا انتخاب کریں گے۔چاروں صوبائی اسمبلیوں کے ارکان ہر صوبے سے سات جنرل نشستوں، دوخواتین نشستوں اور علما سمیت دوٹیکنوکریٹ نشستوں اور پنجاب اور سندھ سے اقلیتوں کی ایک ایک نشست کیلئے سینیٹرز کا انتخاب کرین گے۔

یاد رہے کہ یہ نشستیں رواں ماہ کی 11 تاریخ کو موجودہ ارکان کی مدت ختم ہونے کے بعد خالی ہوئی تھیں۔