اسحاق ڈار پہلی نیوکلیئر انرجی سمٹ میں شرکت کے لیے برسلز پہنچ گئے

وزیر خارجہ اسحاق ڈار پہلی نیوکلیئر انرجی سمٹ میں شرکت کے لیے برسلز پہنچ گئے ہیں۔ دفتر خارجہ کے مطابق یورپی یونین، بیلجیئم اور لکسمبرگ میں پاکستان کی سفیر آمنہ بلوچ نے ان کا استقبال کیا۔

ترجمان دفتر خارجہ کا کہنا ہے کہ وزیر خارجہ اسحاق ڈار برسلز میں ہونے والی سمٹ میں پاکستان کی نمائندگی کریں گے، ان کی شرکت پاکستان کی بین الاقوامی اٹامک انرجی کے ساتھ ایٹمی توانائی کے محفوظ استعمال کے عزم کو مزید مضبوط کرے گی۔

دفتر خارجہ کے مطابق اجلاس میں شرکت کے علاوہ وزیر خارجہ مختلف ممالک کے رہنماؤں اور وزرائے خارجہ سے ملاقاتیں بھی کریں گے، 11 مارچ کو مسلم لیگ (ن) کے سینئر رہنما اسحاق ڈار نے پاکستان کے 39 ویں وزیر خارجہ کا عہدہ سنبھالا تھا۔