ناران میں گلیشیئر کے گرنے سے ہونے والے نقصانات کی ابتدائی رپورٹ مرتب

ناران کے علاقے گملہ اور چپران کے چار سال پرانے گلیشیئر کے پھٹنے سے ہونے والے نقصانات کی ابتدائی رپورٹ مرتب کر لی گئی ہے۔ ڈپٹی کمشنر (ڈی سی) مانسہرہ نے رپورٹ کمشنر ہزارہ ڈویژن کو بھجوا دی ہے۔

رپورٹ کے مطابق رات 10 بجے گلیشیئر پھٹنے سے 20 سے زائد مکانات کو نقصان پہنچا اور تباہ ہونے والے گھروں میں ہوٹل اور کچی بستیاں شامل ہیں۔

ڈپٹی کمشنر کی رپورٹ میں مزید کہا گیا ہے کہ علاقے میں سڑکیں اور موبائل سنگلز بند ہیں جس کی وجہ سے مشکلات کا سامنا ہے، اصل نقصانات کا تخمینہ سڑکوں کے فعال ہونے کے بعد ممکن ہو سکے گا۔

واضح رہے کہ خیبرپختونخوا کے مشہور سیاحتی مقام ناران میں گزشتہ رات برفانی گلیشیئر نے تباہی مچا دی جس کے بعد ناران جھیل روڈ پر واقع متعدد ہوٹل گلیشیئر کے نیچے دب گئے۔پہاڑوں سے آئس گلیشیئر گرنے کا واقعہ ناران سے سیف الملوک جھیل تک ہائی وے پر پیش آیا، برف باری سے متعدد ہوٹل تباہ ہوگئے جب کہ مختلف مقامات پر گلیشیئر کے باعث شاہراہ کاغان مکمل طور پر بند ہوگئی۔

ڈائریکٹر جنرل کاغان ڈویلپمنٹ اتھارٹی محمد شبیر خان نے کہا کہ وہ ناران میں متاثرین کے ساتھ ہر ممکن تعاون کریں گے، نقصانات کا تخمینہ لگانے کے لیے کمیٹی بنا دی گئی ہے اور وہ متاثرہ افراد کی بحالی کے لیے فوری مدد کرے گی۔ ناران روڈ کی بحالی نقصانات کے حوالے سے کچھ کہنا قبل از وقت ہو گا۔