برطانیہ کیساتھ جلد انٹر نیشل پروازیں بحال کریں گے ،اسحا ق ڈار

اسلام آباد: وزیر خارجہ اسحاق ڈار نے پیر کو برطانوی سیکریٹری خارجہ ڈیوڈ کیمرون سے ٹیلی فون پر بات چیت کے دوران پاکستان انٹرنیشنل ایئرلائنز (پی آئی اے) کی برطانیہ (یوکے) کے لیے پروازوں کی جلد بحالی کا عندیہ دیا ۔

اسحٰاق ڈار نے وزارت خارجہ کے مطابق دوطرفہ تعلقات کو مضبوط بنانے کے لیے دونوں ممالک کے درمیان بہتر اسٹریٹجک پارٹنرشپ کے معاہدے کو حتمی شکل دینے کی فوری ضرورت پر زور دیا۔

پاکستان اور برطانیہ کے درمیان پائیدار اور کثیر جہتی تعاون کو اجاگر کرتے ہوئےاسحاق  ڈار نے تجارت، سرمایہ کاری، عوام کے درمیان تبادلے اور موسمیاتی معاملات میں تعاون کو بڑھانے کی ضرورت پر زور دیا۔ انہوں نے دونوں ممالک کے درمیان پی آئی اے کی پروازوں کو فوری طور پر بحال کرنے کی وکالت کی تاکہ روابط کو مضبوط کیا جا سکے ۔

یاد رہے کہ پائلٹس کے لائسنس کی صداقت سے متعلق خدشات کے باعث جولائی 2020 سے پی آئی اے کے فلائٹ آپریشنز کو برطانیہ سمیت متعدد ممالک نے روک دیا تھا۔ کال کے دوران اہم علاقائی امور بشمول افغانستان اور غزہ کی صورتحال پر بات چیت ہوئی۔ اسحاق  ڈار نے لارڈ کیمرون کو دورہ پاکستان کی دعوت دی۔

اپنی تقرری پر برطانوی سیکرٹری خارجہ کے مبارکبادی پیغام پر اظہار تشکر کرتے ہوئے، اسحاق ڈار نے دوطرفہ تعلقات کو مضبوط بنانے کے لیے برطانیہ کی قیادت کے ساتھ قریبی تعاون کے لیے اپنی تیاری کی تصدیق کی۔

یاد رہے کہ گزشتہ ہفتے ملک کی ایوی ایشن اتھارٹی نے اس بات کا عندیہ دیا تھا  کہ تمام معائنے کے اختتام کے بعد مئی میں پی آئی اے کی برطانیہ کے لیے پروازیں دوبارہ شروع ہو جائیں گی۔