ججز کے خط کی جوڈیشل انکوائری کے لیے سپریم کورٹ میں درخواست دائر

ججز کے خط کی جوڈیشل انکوائری کے لیے سپریم کورٹ میں درخواست دائر کردی گئی۔

سینئر قانون دان اعتزاز احسن نے اسلام آباد ہائیکورٹ کے 6 ججز کے خط کی تحقیقات کے معاملے پر سپریم کورٹ کے 3 حاضر سروس ججز پر مشتمل کمیشن تشکیل دینے کے لیے سپریم کورٹ لاہور رجسٹری میں درخواست دائر کردی جس میں وزارت قانون اور وزارت دفاع کو فریق بنایا گیا۔

درخواست میں مؤقف اختیار کیا گیا کہ 25 مارچ کو اسلام آباد ہائیکورٹ کے 6 ججز کی جانب سے سپریم جوڈیشل کونسل کو ایک خط لکھا گیا، ججز کا کورٹ آف کنڈکٹ عدلیہ کے کام میں مداخلت کے بارے میں رہنمائی فراہم نہیں کرتا۔عدلیہ کو دباؤ میں لانے والوں کے خلاف کارروائی کی جائے۔

درخواست میں عدالت سے استدعا کی گئی کہ ججز کے خط کو خفیہ اداروں کی جانب سے عدالتی فیصلوں پر اثر انداز ہونے کا ثبوت تسلیم کیا جائے، غیر قانونی سرگرمیوں میں ملوث خفیہ اداروں کے افراد کے تعین کے لئے کمیشن قائم کیا جائے، وفاقی حکومت ایسی غیر قانونی سرگرمیوں میں ملوث خفیہ اداروں کے تمام افراد کو نوکری سے برطرف کرے۔

دوسری طرف لاہور ہائیکورٹ بار ایسوسی ایشن کی جانب سے بھی ججز کے خط کی جوڈیشل انکوائری کے لیے سپریم کورٹ میں درخواست دائر کی گئی، جس میں حکومتِ پاکستان اور وفاق کو فریق بنایا گیا۔

درخواست میں استدعا کی گئی ہے کہ 6 ججز کے خط پر سپریم کورٹ ججز سے جوڈیشل انکوائری کروائی جائے۔

لاہور ہائیکورٹ بار ایسوسی ایشن نے استدعا کی کہ سپریم کورٹ حکومتی کمیشن کی تشکیل کو کالعدم قرار دے اور خود ججز کے خط کے معاملے پر انکوائری کرے اور ججز کو دھمکانے اور عدالتی امور میں مداخلت کے ذمہ داران کو مثالی سزا دی جائے۔