وزیراعظم شہباز شریف عمرہ کی ادائیگی کیلئے کل سعودی عرب جائیں گے

وزیراعظم شہباز شریف عمرہ کی ادائیگی کیلئے کل سعودی عرب جائیں گے۔

 ذرائع کے مطابق وزیراعظم شہباز شریف سعودی ولی عہد محمد بن سلمان سے ملاقات کریں گے، اس موقع پر مختلف پراجیکٹس سے متعلق بات چیت بھی ہوگی۔

ملاقات کے دوران ریکوڈک پر سعودی عرب کی جانب سے ایک ارب ڈالر کی سرمایہ کاری متوقع ہے، وزیراعظم کے دورہ سعودی کے دوران مختلف ترقیاتی پراجیکٹس کو حتمی شکل دی جائے گی۔

ذرائع کے مطابق وزیر خزانہ محمد اورنگزیب بھی وزیر اعظم کے ہمراہ سعودی عرب جائیں گے۔ وزیر خزانہ نے ریکوڈک میں سعودی عرب کی سرمایہ کاری پر وزیر اعظم کو آگاہ کیا۔ وزارت توانائی، وزارت خزانہ اور سرمایہ کاری بورڈ نے وزیر اعظم کو مکمل پلان دیا ہے۔

ذرائع کا کہنا ہے کہ وزیراعظم شہبازشریف سعودی ولی عہد محمد بن سلمان کو دورہ پاکستان کی دعوت بھی دیں گے۔