اسلام آباد ہائیکورٹ کے 6 ججز کا خط ہمارے سسٹم پر چارج شیٹ ہے، عمر ایوب

قومی اسمبلی میں اپوزیشن لیڈرعمر ایوب نے کہا ہے کہ اسلام آباد ہائیکورٹ کے 6 ججز کا خط ہمارے سسٹم پر چارج شیٹ ہے۔

اسلام آباد ڈسٹرکٹ کورٹ کے باہر میڈیا سے گفتگو میں عمر ایوب نے کہا کہ بانی چیئرمین پی ٹی آئی اور دیگر قیادت کے خلاف کیسز میں کچھ بھی نہیں ہے۔

انہوں نے مزید کہا کہ  دوران عدت نکاح کیس میں کچھ نہیں ہے، حکومتی وکیل مسلسل عدالت سے بھاگ رہے ہیں۔

اپوزیشن لیڈر کا کہنا تھا کہ کیسز میں ہمارے خلاف کچھ نہیں ہے اس لئے عدالتوں میں دوران سماعت وقفہ کردیا جاتا ہے۔

عمر ایوب نے کہا کہ حکومت کا مقصد بانی پی ٹی آئی عمران خان کو نشانہ بنانا تھا، ہم بار بار کہہ چکے ہیں کہ 9 مئی واقعات کی تحقیقات کےلئے آزاد کمیشن بنایا جائے اور سی سی ٹی وی فوٹیج سامنے لائی جائے۔

پی ٹی آئی رہنما نے کہا کہ اپوزیشن الائنس کا موقف آئین اورقانون کا تحفظ ہے۔