ایرانی صدر ابراہیم رئیسی کی پاکستان آمد

ایران اسرائیل کشیدگی کے دوران ایرانی صدر کا دورہ پاکستان متوقع، ذرائع ایرانی سفارتخانے کے مطابق ایرانی صدر 22 اپریل کو 2 روزہ دورے پر اسلام آباد پہنچیں گے۔

ایرانی صدر ابراہیم رئیسی پاکستانی صدر آصف علی زرداری کی دعوت پر دورہ کر رہے ہیں، دونوں رہنماؤں کے درمیان گزشتہ دنوں ٹیلیفون پر بات چیت ہوئی تھی اور ایرانی صدر کے دورہ پاکستان کی تاریخوں کو بھی حتمی شکل دی گئی تھی۔

ایرانی صدر ابراہیم رئیسی صدر پاکستان آصف زرداری، وزیراعظم شہباز شریف کے علاوہ عسکری حکام سے ملاقاتیں کریں گے، ایرانی صدر کے دورہ میں سکیورٹی کے شعبہ میں تعاون، آزاد تجارت معاہدہ (اے ٹی اے) سمیت مختلف شعبوں میں تعاون پر بات بھی ہوگی۔

ایرانی صدر کے دورہ پاکستان کے دوران پاک ایران گیس پائپ لائن پر پیش رفت اور امریکی پابندیوں سے بچنے کا معاملہ بھی زیر غور آئے گا، صدر آصف زرداری اپنے ایرانی ہم منصب کے اعزاز میں ضیافت کا اہتمام کریں گے۔

ایرانی صدر اہراہیم رئیسی کے دورہ پاکستان کے دوران مشرق وسطیٰ کی صورتحال، غزہ پر مسلسل اسرائیلی جارحیت اور ایران اسرائیل کشیدگی پر بھی بات چیت ہوگی۔