پاکستان تحریک انصاف(پی ٹی آئی) کا کاہنہ میں جلسے سے پہلے ہی پولیس کی بھاری نفری جلسے کے مقام پر پہنچ گئی۔

 تفصیلات کے مطابق لاہور پولیس بھاری نفری لے کر جلسہ گاہ پہنچ گئی جبکہ جلسے کی جانب جانے والے راستوں کو کنٹینرز لگا کر بند کیا جا رہا ہے،پولیس کا کہنا ہے کہ حفاظتی اقدامات کے پیش نظر مختلف راستوں کو بند کیا جا رہا ہے۔

دوسری جانب پی ٹی آئی چیئرمین بیرسٹر گوہر نے کہا ہے کہ انتظامیہ سے درخواست کرتا ہوں کہ کل راستوں میں  کسی قسم کی رکاوٹ کھڑی نہ کرے تاکہ رکاوٹیں نہ ہونے پر عوام وقت پر پہنچ سکیں گے اور ہم جلسہ بر وقت ختم کرسکیں،پی ٹی آئی ورکرز سے درخواست ہے، پرامن طریقے سے جلسہ میں شرکت کریں،انہوں نے کہا کہ کارکنوں سے اپیل ہے ایک بجے تک جلسہ گاہ پہنچیں  تاکہ وقت پر سارا عمل ہو،یہ عمران خان کا پیغام ہے کہ سب کارکن جلسہ میں شرکت کریں۔ 

لاہور : ٹک ٹاک پر ویڈیو بنانے کا جنون ایک اور نوجوان کی جان لے گیا۔ 

تفصیلات کےمطابق لیاقت آباد کے علاقے میں گزشتہ روز ایک نوجوان کو اس کے دوست کی فائرنگ سے آنکھ میں گولی لگی تھی، جس کے بعد اسے ہسپتال منتقل کیا گیا تھا۔ تاہم زخمی نوجوان تین روز تک زندگی اور موت کی کشمکش میں رہنے کے بعد دم توڑ گیا۔

پولیس کے مطابق ملزم عمیر زخمی نوجوان احمد کا قریبی دوست تھا۔ واقعے کے بعد ملزم موقع سے فرار ہو گیا تھا۔

ملزم عمیر نے اپنے بیان میں پولیس کو بتایا کہ احمد کے گھر کے باہر ٹک ٹاک بناتے ہوئے گولی چل گئی تھی۔ پولیس نے ملزم عمیر کو گرفتار کرکے رائفل برآمد کرلی اور واقعے کی تحقیقات شروع کردی ہے۔

پولیس نے سی سی ٹی وی فوٹیج اور زخمی کے بیان کی مدد سے ملزم کو گرفتار کر لیا ہے۔ ملزم سے ایک رائفل بھی برآمد ہوئی ہے۔ پولیس نے ملزم کے خلاف مقدمہ درج کر کے تحقیقات شروع کر دی ہیں۔

صدر آصف علی زرداری اور وزیراعظم شہبازشریف نے عوامی جمہوریہ چین کے 75ویں یوم تاسیس کے موقع پر چینی قیادت اور عوام کو دلی مبارکباد دی ہے۔

اسلام آباد میں چینی سفارت خانے کی طرف سے چین کے قومی دن کے موقع پر منعقدہ تقریب سے خطاب کرتے ہوئے صدر مملکت نے مشترکہ خوشحالی اور دنیا میں امن واستحکام کے فروغ کیلئے چین کے ساتھ مل کر کام کرنے کے پاکستان کے عزم کا اعادہ کیا۔

پاک، چین اقتصادی راہداری کی اہمیت کو اجاگر کرتے ہوئے صدر نے کہا کہ سی پیک کے اعلیٰ معیار کے نتیجے میں عوام کویقینا فائدے پہنچیں گے اور اس سے علاقے میں رابطے بڑھیں گے اور خوشحالی آئے گی۔

صدر نے کہا کہ چین پاکستان کاقابل اعتماد بھائی ہے اور پوری قوم کو چین کے ساتھ دوستی پر فخر ہے، دونوں ممالک آزمائش کی ہر گھڑی میں ساتھ کھڑے رہے ہیں۔

اپنے پیغام میں وزیراعظم محمد شہبازشریف نے کہا ہے کہ پاکستان اور چین کے درمیان نہ ٹوٹنے والے تعلقات ہیں۔

مشکل کی گھڑی میں پاکستان کی حمایت کرنے پر چینی قیادت کا شکریہ ادا کرتے ہوئے وزیراعظم نے کہا کہ چین کی مدد کے بغیر پاکستان کیلئے عالمی مالیاتی ادارے کی شرائط کو پورا کرنا ممکن نہیں تھا۔

انہوں نے کہا کہ یہ دوستی ہمالیہ سے اونچی اور سمندر سے گہری ہے ، وزیراعظم نے ہانگ کانگ اور تائیوان سمیت دیگر عالمی امور پر چین کی مکمل حمایت کا اعادہ کیا۔

وزیراعظم نے کہا کہ ہم چین پاکستان اقتصادی راہداری کے دوسرے مرحلے میں داخل ہو رہے ہیں جو پاکستان کی معیشت کوبہتر بنانے میں مددگار ثابت ہوگا۔