آئی ایم ایف پاکستان کے ساتھ تعاون کرنے کو تیار

عالمی مالیاتی فنڈ (آئی ایم ایف) نے تصدیق کی کہ پاکستان نے نیا بیل آؤٹ پیکج حاصل کرنے میں دلچسپی ظاہر کی ہے اور پاکستان کے ساتھ تعاون پر آمادگی بھی ظاہر کی ہے۔

آئی ایم ایف کے مشرق وسطیٰ اور وسطی ایشیا کے شعبے کے ڈائریکٹر جہاد ازور نے اپنے بیان میں کہا کہ حالیہ قرض پروگرام نے پاکستان کو اپنی معیشت کو مستحکم کرنے کا موقع فراہم کیا۔ پاکستانی معیشت کا آخری جائزہ کامیاب رہا۔ زرمبادلہ کے ذخائر میں بہتری اور ترقی کے امکانات بھی بہتر ہوئے ہیں۔

انہوں نے کہا کہ پاکستان کے دو طرفہ شراکت دار بھی اضافی مالی مدد فراہم کرنے کے منتظر ہیں۔ حتمی جائزہ بورڈ کو منظوری کے لیے پیش کیا جائے گا۔ توانائی کے شعبے میں اصلاحات ایک اہم ضرورت اور ترجیح ہے، نجی شعبے اور برآمدات پر زیادہ توجہ دی جائے۔

ڈائریکٹر آئی ایم ایف کا مزید کہنا تھا کہ پاکستان کی جانب سے نئے پروگرام کا مقصد چند اہم معاشی چیلنجز سے نمٹنے میں مدد حاصل کرنا ہے۔ اس پروگرام سے پاکستان کو معاشی استحکام برقرار رکھنے میں مدد ملے گی۔