پاکستان آج اقوام متحدہ کے اشتراک سے ماحولیات کے عالمی دن کی میزبانی کررہا ہے

تفصیلات کے مطابق ماحولیات کا عالمی دن، پاکستان کو میزبانی ملنے کا جشن آج منایا جائے گا ،ماحولیات کے عالمی دن کے میزبان کے طورپر پاکستان ماحولیاتی مسائل اوراس حوالے سے اپنے ملکی اقدامات اور عالمی کوششوں میں اپنے کردارکو اجاگر کرے گا ۔

  ماحولیات کے عالمی دن کی مرکزی تقریب آج  کنونشن سنٹر اسلام آباد میں ہوگی۔تقریب میں 1 ارب درختوں کا ہدف مکمل ہونے اور عالمی میزبانی کا جشن منایا جائے گا ۔  عالمی یوم ماحولیات کی تقریب کے مہمان خصوصی وزیر اعظم عمران خان ہوں گے جبکہ برطانیہ اور چین کے وزرائے اعظم ،اقوام متحدہ کے سیکریٹری جنرل سمیت عالمی لیڈرکے پیغامات نشر ہوں گے۔  وزیر اعظم عمران خان اپنے خطاب میں اب تک کی کامیابیوں  ، نئے اہداف اوراہم اعلانات کریں گے۔تقریب سے معاون خصوصی ملک امین اسلم اور فیصل جاوید خان کا خطاب بھی ہوگا  جبکہ ملی نغمے، بلین ٹری سونامی کی سائیٹس، اور پرفضا مقامات کی جھلک پیش کی جائےگی ۔ 5 جون کی منفرد تقریب میں چاروں صوبوں کا ثقافتی شو روایتی رقص پیش کیا جائے گا۔ تقریب کے حوالے سے کنونشن سنٹرکو پودوں ،پھولوں اور سبز بتوں  سے سجا دیا گیا  ہے ۔

وزیراعظم عمران خان کے زیرقیادت پاکستان مختلف منصوبوں اور اقدامات کے ذریعے ماحولیاتی تبدیلی کے خطرات سے نمٹنے کیلئے اپنا قائدانہ کردارادا کرنے کیلئے پرعزم ہے  ، آج سے  اقوام متحدہ کے دس سالہ پروگرام بعنوان ’’ ماحولیاتی نظام کی بحالی 2021-2030 ء ،، کا بھی باقاعدہ آغاز ہوگا ۔اقوام متحدہ کے اس دس سالہ پروگرام کا مقصد تنزلی اور تباہی کے شکار ماحولیاتی نظام کی بحالی ہے تاکہ ماحولیاتی خطرات سے نمٹا جاسکے ، لاکھوں SPECIES کے نقصان سے بچا جاسکے اورخوراک کے تحفظ ، پانی کی فراہمی اور روزگار میں اضافہ ہوسکے۔