پاکستانی سیٹلائٹ آئی کیوب قمر کی جانب سے پہلی تصویرموصول

 پاکستان کے پہلے سیٹلائٹ مشن' آئی کیوب قمر' کامیابی سے چاند کے مدار میں داخل ہوگیا جس کی پہلی تصویر سامنے آگئی۔

اس سیٹلائٹ کو چاند کی سطح کی تصاویر لینے کے لیے چین کی شنگھائی یونیورسٹی اور اسپیس اینڈ اپر ایٹموسفیئر ریسرچ کمیشن (سپارکو) نے مشترکہ طور پر تیار کیا ہے۔ قمر دو آپٹیکل کیمروں سے لیس ہے۔

دو روز قبل پاکستان کا پہلا سیٹلائٹ آئی کیوب قمر چاند کے مدار میں داخل ہوا تھا۔ یہ خلائی مشن مدار کی جانچ اور تصدیق میں ذیلی نظاموں کا جائزہ لے رہا ہے۔

سپارکو کے مطابق آئی کیوب قمر نے چاند کے گرد 3 چکر لگالیے ہیں۔ مشن 3 سے 6 ماہ تک چاند کے مدار میں گردش کرے گا۔

ترجمان سپارکو نے بتایا کہ آئی کیوب قمر کے کنٹرولرز ، سب سسٹمز اور پروٹو کولز کی مدار میں ٹیسٹنگ کا سلسلہ جاری ہے، یہ مشن چاند کے مدار میں پہنچنے کے بعد 5 سے 6 دن تک تجرباتی مراحل میں رہےگا۔

یاد رہے کہ آئی کیوب قمرکوچینی مشن چینگ6 کےساتھ 3مئی کو ہینان اسپیس لانچ سائٹ سےخلامیں بھیجا گیا تھا۔